Во Нов Зеланд, за прв пат во историјата, полицајка почина на должност

Возач на автомобил нападна полициска патрола во Нов Зеланд, со што е првпат во историјата на земјата била убиена полицајка при вршење на должност. 32-годишниот осомничен е уапсен, а во инцидентот две лица се повредени, пишува АП.

Нападот ја потресе земјата во која ретко се случуваат убиства на полицајци на должност. Постариот наредник Лин Флеминг стана првата полицајка во историјата на Нов Зеланд која умрела како жртва на криминал додека била на должност, соопшти денеска новозеландската полиција.

Во нападот во средата, возило со голема брзина удрило во полицајците додека тие вршеле рутинска патрола на паркинг, а потоа возачот извртел и удрил во полициското возило, изјави полицискиот комесар Ричард Чемберс за новинарите во градот Нелсон на Јужниот остров. Флеминг почина во локалната болница неколку часа подоцна.

Во инцидентот повредени се и двајца случајни минувачи.

Полицијата уапси 32-годишен маж осомничен за повеќе кривични дела, меѓу кои и убиство и обид за убиство.

Од 1890 година загинале 33 полицајци
Пред средата, последното убиство на полицаец на должност во Нов Зеланд се случи во 2020 година, кога полицаец беше убиен од возач кој го удрил и побегнал. Според полициските записи, од 1890 година, 33 полицајци загинале како жртви на злосторства додека биле на должност.

Флеминг беше полицаец 38 години и долгогодишен нетбол тренер во локалното женско училиште. „Таа беше мајка, сопруга и добро познат, високо почитуван член на заедницата на Нелсон“, рече Чемберс.