Владејачката партија во Грузија бара од судот да ги забрани трите најголеми опозициски партии

Претседателот на грузискиот парламент Шалва Папуашвили денес изјави дека владејачката партија Грузиски сон поднела петиција до Уставниот суд за да ги прогласи трите најголеми опозициски партии во земјата за неуставни, објави Ројтерс.

Папуашвили на прес-конференција изјави дека петицијата до Уставниот суд бара забрана на Коалицијата за промени, Обединетото национално движење на поранешниот претседател Михаил Саакашвили и блокот „Силна Грузија“ – сите политички формации со прозападна ориентација.

Грузиската новинска агенција Интерпрес го цитираше претседателот на парламентот како вели дека сите три партии „претставуваат закана за уставниот поредок“.

Некогаш една од најдемократските и прозападните републики во постсоветскиот простор, Грузија брзо стана поавторитативна од почетокот на руската инвазија на Украина и ги зајакна своите економски врски со соседна Русија, објави Ројтерс.

Владејачката партија Грузиски сон ги прекина некогаш блиските врски со Европската унија, замрзнувајќи ги разговорите за приклучување кон блокот до 2028 година и обвинувајќи го Брисел за поттикнување на „шарена“ револуција во Тбилиси.

ЕУ ги отфрла обвинувањата, а владејачката партија во Грузија вели дека сè уште се стреми кон европска интеграција, но само ако може да го зачува мирот со Русија и традиционалните национални православни вредности.

Неколку високи грузиски опозициски личности се во затвор, а полицијата продолжува да апси демонстранти кои организираат редовни антивладини демонстрации, забележува Ројтерс.

Порано оваа година, парламентот донесе закон со кој се олеснува забраната на политичките партии.

Лидери на Грузиски сон, вклучувајќи го и нејзиниот основач и милијардер, поранешниот премиер Биѕина Иванишвили, кој се смета за де факто лидер на земјата, постојано ветуваа дека ќе ги забранат опозициските партии поради, како што велат, врски со затворениот поранешен претседател Михаил Саакашвили.

Барањето до Уставниот суд се базира на наодите на парламентарната комисија што истражува прекршувања за време на владеењето на Саакашвили, што опозициските лидери ги опишуваат како пропаганда.

Саакашвили, кој владееше со Грузија од 2003 до 2012 година, е личност што предизвикува раздор кај Грузијците. Многумина го обвинуваат за авторитарните тенденции и катастрофалната војна со Русија во 2008 година.

Поранешниот претседател моментално е во затвор под обвинение за злоупотреба на моќ и не се очекува да биде ослободен до 2034 година.