Велика Британија го удвојува бројот на војници во Норвешка поради Русија

Бројот на британски војници во Норвешка ќе се удвои во следните три години како дел од напорите за справување со руските закани, објави британскиот министер за одбрана Џон Хили.

Хили прецизираше дека бројот на припадници на вооружените сили стационирани во Норвешка ќе се зголеми од околу илјада на две илјади.

Одлуката доаѓа во време на растечка загриженост меѓу сојузниците на НАТО поради руските активности на Арктикот, кои предизвикуваат повторно отворање на старите бази од Студената војна и посилно воено присуство во регионот, пишува Би-би-си.

„Русија претставува најголема закана за безбедноста на Арктикот“
„Барањата за одбрана растат, а Русија претставува најголема закана за безбедноста на Арктикот и Далечниот Север што ја видовме од Студената војна“, рече Хили.

Во центарот на плановите е иницијативата „Арктички стражар“, предложена од министерката за надворешни работи Ивет Купер. Таа има за цел да го зајакне надзорот и безбедноста во регионот, моделирана според постојните иницијативи на НАТО, како што се оние во Балтикот и Источното крило.

Сојузниците на Велика Британија и НАТО се сè повеќе загрижени за ризикот што Москва го претставува за подморските кабли и цевководи, во услови на зголемени тензии по инвазијата на Украина.

Пакт за одбрана
Минатата година, Лондон и Осло потпишаа пакт за одбрана за заштита на подморските кабли, според кој морнариците на двете земји ќе управуваат со заедничка флота за следење на руските подморници, објавува Би-би-си.

Според Министерството за одбрана на Велика Британија, активноста на руските подморници во британските води се зголемила за 30 проценти во последните две години. Министерството истакнува дека интензитетот на операциите на руските подморници во Северниот Атлантик во моментов е на нивоа видени за време на Студената војна.