Трамп по рацијата во Хјундаи: Почитувајте го законот и обучете ги Американците за вашата работа

Претседателот на САД, Доналд Трамп, изјави дека странските компании што инвестираат во Соединетите Држави треба да вработуваат и обучуваат американски работници, коментирајќи го минатонеделната рација во фабриката на јужнокорејскиот производител на автомобили Хјундаи во Џорџија.

Во објава на неговата социјална мрежа Truth Social, Трамп ги повика „сите странски компании што инвестираат во Соединетите Држави да ги почитуваат законите за имиграција на нашата земја“.

„Вашата инвестиција е добредојдена и ве охрабруваме легално да ги доведете вашите многу паметни луѓе, со одличен технички талент, за да создаваат производи од светска класа, а ние ќе ви го овозможиме тоа брзо и легално“, продолжи Трамп. „Она што го бараме за возврат е да вработите и обучите американски работници“, додаде тој.

Американските власти извршија рација во фабрика за автомобилски акумулатори во четврток. Главниот обвинител Маргарет Хип во петокот зборуваше за „над 400 нелегални работници кои се идентификувани и уапсени“.

„Целта на оваа операција е да се намали нелегалното вработување и да се спречат работодавците да добијат неправедна предност со вработување нелегални работници. Втората цел е да се заштитат нелегалните работници од експлоатација“, додаде таа.

Апсењата доведоа до дипломатски тензии меѓу Вашингтон и Сеул. Економските активности на компаниите што инвестираат во САД и правата и интересите на нејзините граѓани не треба да бидат „неправедно“ засегнати, изјави во петокот портпаролот на јужнокорејското Министерство за надворешни работи.