Суд во Авињон утре ќе донесе пресуда за Французинот кој овозможувал силување на неговата сопруга

Суд во Авињон утре ќе ја донесе пресудата за Доминик Пеликот и околу 50 други мажи обвинети за долгогодишно силување на Жизел Пеликот, сопругата на првообвинетиот, која стана икона на феминизмот со нејзината одлука да го одржи судењето отворено за јавно со цел да се сврти вниманието кон сексуалните злосторства врз жените ширум светот.

Во ноември, обвинителот побара максимална затворска казна од 20 години за Доминик Пеликот, кој речиси една деценија ги организирал групните силувања на неговата сопруга Жизел додека била дрогирана и онесвестена. Пеликот ги снимал силувањата и споделувал фотографии и видеа од злоупотреба на неговата сопруга.
Тој призна дека ги „регрутирал“ силувачите на интернет. Француското обвинителство побара казни од 10 до 18 години затвор за 51 второобвинет.

Сега 72-годишната Жизел Пеликот од самиот почеток одби судење зад затворени врати, наспроти советите на обвинителството и адвокатите на одбраната кои сакаа да избегнат судењето да се претвори во „спектакл“, јавија француските медиуми.