Столтенберг: Целта на Русија е да го заземе целиот Донбас

Генералниот секретар на НАТО, Јенс Столтенберг денеска изјави дека Русија не се откажува од инвазијата врз Украина и дека следните седмици ќе се обиде целосно да го освои регионот Донбас.

– Сега гледаме значително движење на (руските) трупи подалеку од Киев за да се прегрупираат, повторно да се вооружат и да се снабдат и да го префрлат нивниот фокус на исток. Во следните недели очекуваме натамошен руски притисок во источна и јужна Украина и ќе се обидат да го заземат целиот Донбас и да формираат копнен мост до окупираниот Крим, изјави Столтенберг пред состанокот на министрите за надворешни работи на НАТО.

Столтенберг посочи  дека сојузниците на НАТО се решени да испорачаат дополнително оружје за Украина. Тој предупреди дека се влегува во „круцијална фаза“ на војната.

– Русија се повлекува од Киев и од поголемиот дел од северот, значително го намалува присуството затоа што не успеа, Путин не ја постигна целта, неговата цел беше да го заземе Киев, но не успеа да го заземе и многу градови на северот. Сега ги преместува трупите од северот кон Белорусија, па долу на исток во Русија, со цел да ги обнови трупите со војници и муниција, посочи Столтенберг.

Русија, рече генералниот секретар, брои големи загуби, но нема да се откаже.

– Очекуваме нова концентрирана офанзива врз Донбас, за да го заземе цел Донбар, областа каде Украина има и најмногу вооружени сили. За тоа е потребно неколку недели. Се плашиме дека ќе има нова голема руска офанзива во Донбас и во тој временски рок е екстремно важно да дадеме поддршка, да ги снабдиме украинските сили вклучително и со разни видови опрема, објасни Столтенберг.

Министрите за надворешни работи на НАТО ќе разговараат токму за разните видови поддршка што треба да и се дадат на Украина, испорака на противтенковско оружје, системи за противоздушна одбрана и друга опрема. Но, НАТО нема да смени став во однос на испраќањето свои сили на терен ниту затворање на небото.

– Нема да има трупи на НАТО, ниту авиони на НАТО во украинското небо. Имаме одговорност да спречиме војна помеѓу Русија и НАТО, која би предизвикала уште повеќе смрт, уништување и би била уште поопасна, рече Столтенберг и додаде дека не очекува ниту една земја-членка на Алијансата да побара испраќање на НАТО војска во Украина. Тој повтори дека директна конфронтација со Русија, која е нуклеарна сила претставува преголема опасност за НАТО земјите.

Столтенберг предупреди дека откако ќе се повлечат целосно руските трупи од Украина, треба да се очекуваат нови сцени како оние во Буча. За НАТО масакрот во Буча е целосно одговорност на Москва. Русија од своја страна обвинува дека масакрот е извршен по руското повлекување од овој град на крајот на март.

– Имаме информации од многу разни извори, отворени извори, комерцијални сателити, сите ја кажуваат истата приказна. Се случија брутални ѕверства на многу места во Украина и се случија кога Русија ги контролираше. Се плашам дека ќе видиме уште примери на убивање и таргетирање на цивили, што се воени злосторства, наведе Столтенберг.

Членството на Украина во НАТО и натаму не е маса, затоа што за такво нешто нема консензус помеѓу 30-те земји членки на Алијансата. Според Столтенберг важно е да се извлечат поуките од војната во Украина за да можат да се спречат исти сценарија во земји кои се наоѓаат во слични ситуации, посочувајќи ги како пример Грузија и Босна и Херцеговина.