Спектакуларно враќање на левичарот Лула да Силва на изборите во Бразил

Луис Инасио „Лула“ да Силва е избран за следен претседател на Бразил, во неверојатен кам-бек по тесниот втор круг во неделата. Неговата победа навестува промена во најголемата земја во Латинска Америка, по четири години екстремно десничарска администрација на Жаир Болсонаро.

Победата на 76-годишниот политичар претставува враќање на левицата на власт во Бразил и завршува триумфално лично враќање на Лула да Силва, по серијата обвинувања за корупција кои доведоа до негово затворање од 580 дена. Казните подоцна беа поништени од Врховниот суд, отворајќи му го патот да се кандидира за реизбор.

„Тие се обидоа да ме закопаат жив и јас сум тука“, рече тој во радосниот говор пред поддржувачите и новинарите во неделата вечерта, опишувајќи ја победата како негово политичко „воскреснување“.

 „Почнувајќи од 1 јануари 2023 година, јас ќе владеам за 215 милиони Бразилци, а не само за оние кои гласаа за мене. Нема два Бразила. Ние сме една земја, еден народ, една голема нација“, рече Лула да Силва.

Тој ќе ги преземе уздите на земјата зафатена од груба нееднаквост која сè уште се бори да се опорави од пандемијата на Ковид-19. Приближно 9,6 милиони луѓе се најдоа под прагот на сиромаштија меѓу 2019 и 2021 година, а стапките на писменост и посетување на училиште паднаа. Тој, исто така, ќе се соочи со длабоко поделена нација и итни еколошки прашања, вклучително и неконтролирано уништување на шумите во Амазон.

Ова ќе биде негов трет мандат, откако претходно управуваше со Бразил во два последователни мандати во периодот од 2003 до 2010 година.

Победата на поранешниот лидер во неделата беше последна во политичкиот бран низ Латинска Америка, со победи на левоориентираните политичари во Аргентина, Колумбија и Чиле. Но, Лула да Силва – поранешен синдикален лидер со работничка заднина – се обидуваше да ги увери умерените во текот на неговата кампања.

Тој изгради широк сојуз, вклучувајќи неколку политичари од центарот и десниот центар, вклучително и историските противници од ПСДБ, Социјалдемократската партија на Бразил. Во кампањата, Лула да Силва не сакаше да ги покаже своите карти кога станува збор за конципирањето на економската стратегија – тенденција што заработи остри критики од неговите конкуренти.

Лула да Силва рече дека ќе го притисне Конгресот да одобри даночна реформа која ќе ги ослободи лицата со ниски приходи од плаќање данок на доход. И неговата кампања доби поттик од центристичкиот поранешен претседателски кандидат Симоне Тебет, кој беше трет во првиот круг претходно овој месец и му даде поддршка на Лула да Силва во вториот круг.

Тој, исто така, доби поддршка од неколку реномирани економисти високо ценети од инвеститорите, вклучувајќи го и Арминио Фрага, поранешен претседател на бразилската централна банка.

Неговиот најголем предизвик сега може да биде обединување на една политички поделена земја.

Неколку часа по објавувањето на резултатите, Болсонаро допрва треба да го признае поразот или да даде каква било јавна изјава. Во меѓувреме, видеата на социјалните мрежи покажаа дека неговите поддржувачи ги блокирале автопатите во две држави во знак на протест против победата на Лула да Силва.

„Ќе заминеме само ако армијата ја преземе земјата“, рече еден неидентификуван поддржувач на Болсонаро во видеото снимено во јужната држава Санта Катарина.

Лула да Силва ќе треба да продолжи со дијалог и да ги обнови односите, рече Карлос Мело, политиколог во Инспер, универзитет во Сао Паоло. „Претседателот може да биде важен инструмент за ова сè додека не е загрижен да се обраќа само на неговата база на гласачи“, рече тој.

Со повеќе од 58 милиони гласови дадени за неговиот ривал Болсонаро – кој беше поддржан од поранешниот американски претседател Доналд Трамп – Лула да Силва ќе мора да формира „прагматични сојузи“ со делови од центарот и десницата кои се надоврзаа на политиката на неговиот претходник, додава Тиаго Ампаро, професор по право и човекови права на деловното училиште ФГВ во Сао Паоло.

Во исто време, тој ќе мора да ги исполни очекувањата на поддржувачите, додаде Ампаро. „Многу гласачи излегоа на гласањето очекувајќи го тоа, не само за да се ослободат од Болсонаро, туку и со сеќавањата на подобрите економски времиња за време на претходните влади на Лула“.

На последните избори, Либералната партија на Болсонаро ги зголеми своите претставници во Долниот дом од 76 на 99, додека во Сенатот двојно се зголеми од седум членови на 14. Работничката партија на Лула да Силва, исто така, го зголеми бројот на пратеници од 56 на 68 и сенатори од седум на осум – но генерално, конзервативните наклонети политичари ќе доминираат во следниот законодавен дом.

Во меѓувреме, еколозите внимателно ќе ја следат администрацијата на Лула да Силва, бидејќи таа презема управување не само со бразилската нација, туку и со најголемите шумски резерви на планетата.

Со уништувањето на огромната амазонска прашума што достигна рекордно ниво под претседателството на Болсонаро, Лула да Силва постојано изјавуваше за време на неговата кампања дека ќе се обиде да го спречи уништувањето на шумите. Тој тврди дека заштитата на шумите може да донесе одреден профит, наведувајќи ја убавината и фармацевтската индустрија како потенцијални корисници на биолошката разновидност.

Во интервју за странски печат во август, Лула да Силва повика на „ново светско владеење“ за справување со климатските промени и истакна дека Бразил треба да преземе централна улога во тоа владеење, со оглед на неговите природни ресурси.

Според шефот на владиниот план на Лула да Силва, Алоизио Меркаданте, друга тактика ќе биде да се создаде група вклучувајќи Бразил, Индонезија и Конго пред Конференцијата на страните предводена од ОН во ноември 2022 година. Групата ќе има за цел да изврши притисок врз побогатите земји да ја финансираат заштитата на шумите, како и да ги наведат стратегиите за глобалниот пазар на јаглерод.

Неколку експерти изјавија дека веруваат дека неговиот став за животната средина и климатското прашање може да претставува нов почеток во меѓународните односи на Бразил. (Си-Ен-Ен)