„Спејс Икс“ лансира ракета носач со 60 микросателити
САД– Спејс Икс (SpaceX) лансираше ракета носач Фалкон 9 со 60 микросателити Старлинк.
Лансирањето беше пренесувано во живо на веб-страницата на приватната американска компанија на Илон Маск.
Ракетата беше лансирана пред 23 часот по локално време вчера од космодромот Кејп Канаверал, на Флорида. Фалкон 9 беше користен во пет претходни лансирања за да се намалат трошоците, но овој пат SpaceX не успеа да го врати на специјално дизајнираната пловечка платформа.
Лансирањето беше закажано за в недела, но беше одложено за еден ден поради неповолни временски услови.
Проектот Старлинк на Спејс Икс е мрежа на сателити во орбитата за да се обезбеди пристап до интернет. Пуштањето во употреба на вкупно 11.000 микросателити ќе чини 10 милијарди долари.