Словачкиот претседател повика на пристапување на Бугарија и Романија во Шенген

 Словачкиот претседател Петер Пелегрини повика денеска на пристапување на Романија и Бугарија во Шенген зоната, јавија словачките медиуми.

-Словачка долго време е еден од поддржувачите на проширувањето на ЕУ со вклучување на клучните балкански земји, рече тој на заедничката прес-конференција во Виена со австрискиот претседател Александар ван дер Белен.

Според него, би било целисходно Романија и Бугарија да станат полноправни членки на Шенген зоната за да се реши проблемот со илегалната миграција. Ван дер Белен рече дека, според него, ЕУ „не ја сфаќа сериозно ситуацијата на Западен Балкан“ и ја изрази потребата овие земји да влезат во Унијата.

Шефовите на држави разговараа за Европската унија, можниот состав на Европската комисија, руската инвазија на Украина и граничната контрола на словачко-австриската граница.

-Во економска смисла, Австрија е еден од најважните партнери на Словачка. Го уверив претседателот дека Словачка ќе остане добро место за австриските инвестиции и австрискиот бизнис, рече Пелегрини.

Австрискиот претседател ги пофали и добрите економски односи и рече дека Австрија е втор по големина инвеститор во Словачка. Тој исто така спомна дека 40.000 Словаци се преселиле да живеат во Австрија и секој ден 340.000 луѓе патуваат од Словачка во Австрија за да работат.