Славниот астронаут Баз Олдрин се ожени на 93 години

Астронаутот Едвин „Баз“ Олдрин на Фејсбук објави дека се оженил со својата „долгогодишна љубов“ на мала церемонија во Лос Анџелес.

Олдрин, кој влезе во историјата заедно со Нил Армстронг како први луѓе кои стапнале на површината на Месечината, рече дека венчавката се одржала во петокот, кога бил неговиот 93-ти роденден.

„Со задоволство можам да објавам дека јас и мојата долгогодишна љубов и партнер, д-р Анка В Фаур, се венчавме. Ние влеговме во светиот брак на мала приватна церемонија во Лос Анџелес и сме возбудени како тинејџери кои избегаа“, напиша тој.

Објавата доби 53.000 „лајкови“ и „љубов“ на Фејсбук до сабота и беше придружена со неколку фотографии од младенците.

На 20 јули 1969 година, астронаутите на „Аполо 11“ Армстронг и Олдрин ја направија својата историска прошетка по површината на Месечината, исполнувајќи го заветот на починатиот претседател Џон Кенеди да испрати човечки екипаж на Месечината и безбедно да ги врати на Земјата. Мајкл Колинс беше третиот член на екипажот.