СДСМ сѐ уште нема став за проширувањето на владата со нови министерства

СДСМ како главна опозициска партија сѐ уште нема официјален став дали ќе го поддржи предлогот на ВМРО-ДПМНЕ да се рекомпонира владата и место 20 – во иднина да има 24 министерски места. Според најавите, овој предлог многу бргу ќе се најде пред пратениците како иницијатива, а за да биде изгласан ќе бидат потребни гласови од две третини од нив, што очекуваната владејачка коалиција сѐ уште ги нема.

Настојувањата на ВМРО-ДПМНЕ биле прво да се договори составот на комисиите наредната недела, а веднаш потоа и да се отвори ова прашање во Собранието. Начелно, како што се дознава од кругови од опозицијата, формален став за промената на бројот и на структурата на министерствата не е договорен, но ако решат да го поддржат предлогот, пратениците на коалицијата на СДСМ нема да го направат тоа како бланко поддршка. Според толкувањата во опозицијата, зад иницијативата на ВМРО-ДПМНЕ пред сѐ стои потребата да се задоволат апетитите на албанските коалициски партнери од Вреди. 

Во моментов владата, на чие чело е техничкиот премиер Талат Џафери, има 20 членови. Од нив четворица се потпретседатели. ВМРО-ДПМНЕ планира воведување на нови министерства, како за енергетика и минерални суровини на пример, но и прегрупирање на некои од досегашнатите и префрлање на одредени сектори од едно во друго.

Пратеникот Антонио Милошоски веќе најави дека новата влада ќе има 23 министри плус премиерот Христијан Мицкоски. Значи, наместо намалување на владината структура ќе има зголемување, иако тоа се коси со предизборните ветувања на ВМРО-ДПМНЕ. Трите коалициски партнери во идната влада, ВМРО-ДПМНЕ, „Вреди“ и ЗНАМ, имаат 78 пратеници и ним им требаат уште двајца за двотретинско мнозинство за да се промени законот. (Н.В.)