Русија „радикално“ ќе ги намали воените активности кај Киев и Чернихив
Предлозите за разгледување вклучуваат 15-годишен период на консултации за статусот на анектираниот Крим. Украина се обврзува на неутралност
По четиричасовните преговори во Истанбул меѓу Русија и Украина сепак има некакви резултати.
Заменик-министерот за одбрана на Русија, Александар Фомин, рече дека Москва одлучила „радикално да ја намали воената активност во насока на Киев и Чернихив“ со цел „да ја зголеми меѓусебната доверба и да создаде соодветни услови за идните преговори и да ја постигне конечната цел за потпишување мировен договор со Украина“.
Фомин додаде дека руската делегација ќе даде повеќе детали за одлуката за намалување на воената активност при нивното враќање во Москва.
Зборувајќи заедно со Фомин, главниот руски преговарач Владимир Медински рече дека разговорите биле „конструктивни“, додавајќи дека Русија презема „два чекори за деескалација на конфликтот“.
Медински рече:
„Добивме предлози од Украина да ја разгледаме нивната јасно формулирана позиција за вклучување во мировниот договор. Овие предлози ќе бидат разгледани во наредниот период и доставени до претседателот на државата и ќе биде даден одговор“.
Медински рече и дека во иднина е можна средба меѓу рускиот претседател Владимир Путин и неговиот украински колега Володимир Зеленски. Средбата меѓу Путин и Зеленски е можна истовремено со прелиминарното потпишување на мировниот договор.
Украинскиот тим во преговорите рече дека предложил усвојување неутрален статус во замена за безбедносни гаранции, што значи дека нема да се приклучи на воени сојузи или да биде домаќин на воени бази.
Предлозите, исто така, ќе вклучуваат 15-годишен период на консултации за статусот на анектираниот Крим и може да стапат на сила само во случај на целосен прекин на огнот, изјавија преговарачите за новинарите во Истанбул.
Предлозите се најдетални и најконкретни што Украина ги објави јавно, пренесува Ројтерс.
Преговарачот Олександер Чали рече во коментарите емитувани на украинската национална телевизија:
„Ако успееме да ги консолидираме овие клучни одредби, а за нас тоа е најфундаментално, тогаш Украина ќе биде во позиција всушност да го поправи својот сегашен статус како не-блоковска и ненуклеарна држава во форма на постојана неутралност“.
Тој додаде:
„Нема да бидеме домаќини на странски воени бази на наша територија, како и распоредување воени контингенти на нашата територија и нема да влегуваме во воено-политички сојузи. Воените вежби на наша територија ќе се одвиваат со согласност на земјите гаранти“.
Имаше доволно материјал во актуелните украински предлози за да се гарантира средба меѓу украинскиот претседател Володимир Зеленски и рускиот лидер Владимир Путин, рекоа украинските преговарачи, додавајќи дека го чекаат одговорот на Русија.