Речиси два милиони турски граѓани гласаа во дипломатските претставништва во странство за изборите на 14 мај

 Синоќа заврши гласањето на турските гласачи во дипломатските претставништва на Турција за претседателските и парламентарните избори што ќе се одржат во недела на 14 мај.

Гласањето во странство започна на 27 април. Гласачки места беа отворени во вкупно 73 земји во светот.

Според Високата изборна комисија, во турските дипломатски претставништва во странство гласале 1.751.365 луѓе, што надминува 51 отсто. Тоа е највисокото ниво од изборите во 2011 година.

Гласачките ливчиња доставени во странство заедно со ковертите и записниците се ставаат во посебни торби, кои се запечатуваат во присуство на секциските комисии и сведоци. Тие потоа се испорачуваат со дипломатски курири со авиони на Туркиш ерлајнс и се предаваат на Високата изборна комисија во турскиот главен град Анкара.

Турските медиуми објавија дека гласачките ливчиња од странство се пристигнати и се чуваат во седиштето на Трговско-индустриската комора на Анкара.

Во меѓувреме продолжува гласањето на турските гранични пунктови кои се вкупно 46. Тоа ќе заврши на 14 мај во 17 часот кога ќе заврши изборниот процес во земјата. Од 27 април досега на граничните премини, аеродромите и пристаништата гласале 125.479 луѓе.

Според турскиот изборен закон, броењето на гласачките ливчиња доставени во странство и на граничните премини ќе се одржи на 14 мај по завршувањето на изборниот ден заедно со останатите гласачки ливчиња.

По бројност (3.044.387 се регистрирани гласачи во странство), електоратот во странство всушност претставува четврта по големина изборна единица по Истанбул, Анкара и Измир.

Најголема по бројност е турската дијаспора во Германија, каде беа отворени 26 избирачки места, а потоа следат Франција, Австрија, Белгија и Холандија.

На претседателските избори во 2018 година, 60,2 отсто од гласачите во странство гласаа за Ердоган.