Прочуената „Авганистанка со зелени очи“ евакуирана во Италија

Шарбат Гула го напушти Авганистан по преземањето на власта од страна на Талибанците. Италија ѝ понуди прибежиште

Познатата зеленоока „Авганистанка“ на магазинот National Geographic пристигна во Италија како дел од западната евакуација на Авганистанците по преземањето на земјата од Талибанците, соопшти италијанската влада.

Кабинетот на премиерот Марио Драги соопшти дека Италија ја организирала евакуацијата на Шарбат Гула откако таа побарала да ѝ се помогне да ја напушти земјата. Италијанската влада ќе ѝпомогне таа да се интегрира во животот во Италија, се вели во соопштението во четвртокот. Според „Дејли мејл“, Гула боледува од хепатитис Ц и за медиумите изјавила дека нејзиниот сопруг починал пред неколку години.

Гула се здоби со меѓународна слава во 1984 година како авганистанска бегалка, откако нејзината фотографија на воениот фотограф Стив Мекари, со продорни зелени очи, беше објавена на насловната страница на National Geographic и стана неверојатен симбол на војната во Авганистан.

Нејзиниот идентитет беше откриен дури во 2002 година кога Мекари се врати во регионот и ѝ влезе во трага. National Geographic тогаш рече дека аналитичар на ФБИ, форензичар и пронаоѓач на препознавање на ирисот го потврдиле нејзиниот идентитет.

Во 2014 година, таа била во Пакистан, но се криела кога властите ја обвиниле дека купила лажна пакистанска лична карта и наредиле да биде депортирана. Таа беше однесена во Кабул каде што претседателот приреди прием за неа во претседателската палата и ѝ ги предаде клучевите од новиот стан.

Италија беше една од неколкуте западни земји кои со авион изнесоа стотици Авганистанци надвор од земјата по заминувањето на американските сили и талибанците во август. (АП)