Претседателот на Кенија: Време е за европски инвестиции во Африка
Време е Европа да го пренесе својот капитал и технологија во Африка за да го отклучи својот потенцијал во корист на двата континента, изјави денеска во Европскиот парламент кенискиот претседател Вилијам Руто.
Лидерот на африканска земја со околу 53 милиони жители се смета за клучен сојузник на Западот во Африка. Руто ја критикуваше одлуката на рускиот претседател Владимир Путин да се повлече од договорот што дозволува извоз на украинско жито, клучно за Африка, нарекувајќи го „убод во грб“.
Руто става голем акцент на прашањето за климатските промени и неодамна организираше африкански состанок на оваа тема во Најроби, а кога 17 африкански лидери отидоа во Москва да се сретнат со рускиот претседател, Руто го прескокна патувањето.
„Руто е истомисленик Европеец“
Тој денеска зборуваше на пленарната седница во Стразбур, а претседателката на Европскиот парламент Роберта Мецола го прогласи за истомисленик Европеец и сојузник посветен на истите вредности.
Тој во парламентот зборуваше за потенцијалот на Африка во зелената транзиција, што може да придонесе и за економско зајакнување на континентот.
„Влеговме во ера на глобално вриење, некогаш наречено глобално затоплување“, рече Руто, предупредувајќи дека Африка ги чувствува климатските промени позначајно од остатокот од светот.
Повика на европски инвестиции во Африка
Кенискиот лидер нагласи дека во денешниот меѓусебно поврзан свет, судбините на континентот зависат една од друга, па повика на реципрочен однос меѓу Африка, со сè уште присутната лузна на колонијализмот, и Европа, која треба да ги пренесе таму својот капитал и технологии. на таргетиран начин.
Африка, континент со 60 отсто од обработливото земјиште во светот, може да стане зелен мотор во светот, но потребни се поголеми инвестиции. Руто нагласи дека од вкупно три трилиони долари вложени во зелената транзиција во изминатите две децении, само 2 отсто отишле во Африка и покрај големиот потенцијал.
„На Африка ѝ треба поголем пристап до европскиот пазар, но без отстапки“
Тој посочи дека денес Африка се задолжува пет пати повеќе од другите земји, што е неодбранливо „не само економски, туку и морално“. Затоа, неопходна е „колективна волја“ и нови видови соработка меѓу двата континента за да се промени ова, во корист на двете страни.
„Ова може да го намали притисокот врз Европа, која е се повеќе зависна од економските мигранти за да го одржи својот животен стандард“, рече Руто, повикувајќи на инвестиции во образованието на младите за „Африканците да ја градат иднината дома“.
Тој исто така нагласи дека на Африка и треба поголем пристап до европскиот пазар, но без отстапки бидејќи Африка е подготвена за пазарна конкуренција. „Нашата соработка донесе милиони работни места. Тоа партнерство не е важно само за минатото и сегашноста, туку и за иднината“, заклучи Руто и ги повика европските институции и компании да ги истражат „многуте можности“ што ги очекуваат во Африка.