Пратеникот на Трамп ја откажа посетата на Русија откако Путин одби да разговара за прекин на огнот

Специјалниот претставник на САД за Украина, Стивен Виткоф, планирал да ја посети Русија оваа недела за петтата рунда разговори со Владимир Путин, но ја откажал својата посета, објави „Фајненшл тајмс“, повикувајќи се на три извори запознаени со ситуацијата.

Според нив, одлуката е донесена откако руските претставници го информирале Вашингтон дека Путин нема намера да разговара за мировниот план што Виткоф го составил по консултациите со претставници на Украина и Европа.

Планот од 22 точки бил подготвен со учество на клучни функционери на кои Трамп им го доверил украинското прашање: покрај Виткоф, во развојот учествувале државниот секретар Марко Рубио и Кит Келог, пензиониран генерал на американската армија и специјален претставник на САД за Украина. Од украинска страна, преговорите ги воделе шефот на претседателската канцеларија Андриј Јермак и министерот за одбрана Рустам Умеров.

Како дел од планот, Киев се согласил на територијални отстапки. „Украинците се подготвени да се откажат од териториите окупирани од Русите, не де јуре, засекогаш, туку де факто, бидејќи Русите ефикасно ја окупирале оваа земја“, изјави Виткоф порано.

Но, руската страна не е задоволна од ова: делегацијата предводена од Владимир Медински, авторот на концептот за дополнителен хромозом кај рускиот народ, на разговорите во Истанбул во петокот ja побара целата територија на четири украински региони – Донецк, Луганск, Запорожје и Херсон – во рамките на нивните административни граници, вклучувајќи ги и земјите што руската армија не ги контролира. Исто така, според извори на Блумберг, Медински побарал анексијата на „новите региони“ и Крим да бидат признаени од меѓународната заедница, а Киев да се согласи на неутрален статус и одбивање да распореди странски трупи.

Извор во украинската делегација за „Економист“ изјавил дека Медински се заканил дека Русија ќе заземе уште два украински региони – Сумi и Харков, доколку Киев не се согласи со руските услови. Тој, исто така, ја прогласил својата подготвеност да се бори „засекогаш“, осврнувајќи се на историјата на Русија од 18 век. „Не сакаме војна, но сме подготвени да се бориме една година, две, три – колку што е потребно. Се боревме со Шведска 21 година“, рекол Медински, според изворот на „Економист“.

Кремљ се обложува на одложување на мировните преговори за Украина со цел да заземе што е можно повеќе територија, изјавија извори претходно за „Москва тајмс“. Според еден од нив, функционер близок до Кремљ, Путин има за цел по секоја цена да добие контрола врз припоените региони, бидејќи не може да ги изгуби откако нивниот статус е загарантиран во Уставот.

Алтернативно, Русија би можела да се обиде да заземе други украински региони, а потоа да понуди размена за Херсон и Запорожје, рече изворот.

Путин не е подготвен за преговори, бидејќи руската армија во моментов има предност на фронтот, изјави воениот експерт и поранешен вработен во Службата за безбедност на Украина, Иван Ступак, за Дојче веле: „Тие се добро свесни дека за 30 дена од прекинот на огнот, Украинците ќе ископаат уште повеќе засолништа, ќе подготват повеќе беспилотни летала, а руските загуби ќе бидат многу пати поголеми. Затоа, тие сакаат да притиснат, да бараат Сумискиот регион да биде припоен и ќе зборуваат со ултиматуми“.