Пожарот во „Дрисла“ го гасат десет противпожарни возила, а две цистерни на ЈП „Комунална хигиена“ носат вода

Десет противпожарни возила го гасат пожарот во депонијата „Дрисла“ кој избувна попладнево. Како што информираше за медиумите Звонко Томевски, командант на Територијалната противпожарна бригада на Град Скопје, била побарана помош и од ЈП „Комунална хигиена“ од каде што се пратени две цистерни за дотур на вода, тие се на локацијата и ги дополнуваат противпожарните возила.

-Така што, се надевам дека за брзо време пожарот ќе биде целосно изгаснат, изјави Томевски.

Бил побаран и авион на Дирекцијата за заштита и спасување за помош при гасењето, но, за жал, рече тој, немало услови да интервенира. 

-Станува збор за посериозен пожар од поголеми размери, имаше опасност да се зафати околната борова шума која е во близина на депонијата и да се предизвика дополнително шумски пожар којшто можеше да загрози понатаму и  објекти кои се во близина, додаде командантот на Територијалната противпожарна бригада на Град Скопје. 

Претходно, Директорот на Дирекцијата за заштита и спасување (ДЗС), Стојанче Ангелов, информираше за состојбата со пожарот кој попладнево избувна на депонијата Дрисла, во близина на селото Батинци.

– Скопските пожарникари со сите сили се обидуваат да го локализираат пожарот во депонијата. Направени се противпожарни појаси за да не се дозволи огнот да се прошири кон блиската трева, грмушки и шума од горната страна на депонијата. Нема опасност од излегување на огнот надвор од депонијата. Гаснењето е во тек. Постојат сомнежи дека пожарот е предизвикан намерно“, изјави Ангелов.

Ангелов потсети дека летово имавме рекордно високи температури, но Дрисла не се самозапали, па оттаму и сомнежите за подметнување.