Пол ван Дајк доаѓа во Охрид- настап на диџеј ѕвездата на плажата Горица 3

Еден од најголемите диџеи на сите времиња, двократниот број еден светски диџеј Пол Ван Дајк на 30 јули доаѓа во Охрид, каде што ќе настапи на плажата Горица 3.

Ова нема да биде прв настап на овој германски диџеј во Македонија, а за потребите на спектаклот ќе биде поставена бина по светски стандарди, надополнета со посебни ефекти, врвно озвучување и уникатно осветлување, кое е карактеристично за настапите на Пол Ван Дајк.

Картите ќе бидат по промотивна цена од 500 денари до 20 јули, а истите може да ги купите преку продажната мрежа на kupikarta.com и кај Аждер.

Електронската светска супер ѕвезда уште од раните деведесетти години ги поставува светските стандарди како диџеј. Во краток рок ја стекнува популарноста со мегахитот „For An Angel”, една од најголемите и највлијателните електронски траки на сите времиња. Добитник е на Греми награда за албумот од 2003 насловен „Reflections”, а досега има продадено повеќе од 5.000.000 албуми ширум цел свет. 

Ван Дајк објави два албуми кои се најдоа на врвот на топ листите во 2018 и 2019 година – „From then On” и „Music Rescues Me”, кои наидоа на признание од критичарите. Тие беа направени во месеците по страшната несреќа во која Ван Дајк падна низ лошо дизајнирана бина за време на фестивалски настап во Европа на почетокот на 2016 година.

По неколку месечниот престој во болница, каде што не беше сигурно дали Ван Дајк некогаш повторно ќе може да оди, а камоли да настапува како диџеј или да прави музика, тој се врати во студио и почна да спојува претходни идеи кои на крајот ќе се претворат во албум.

Поминувајќи низ едно од најнесреќните искуства кои секој изведувач би можел да го замисли, Ван Дајк излезе од немилата судбина, со нова смисла за живот и подмладена страст за правење на музика.