Почина Киро Кипроски новинар и публицист од Гостивар

Киро Кипроски новинар и публицист почина утрово на 7- годишна возраст. Тажната вест ја објавија членови на неговото семејство.

Во неговата петдецениска кариера најдолго работеше во локалната радиостаница Радио Гостивар, а како дописник соработуваше со МИА, Нова Македонија, Утрински весник, Макфакс, Радио Скопје, Екран, Дојче Веле и повеќе неделници и ревии од поранешната Југославија.

Автор е петнаесетина монографии и книги за кои добил и признанија. Тој на читателската публика ѝ е познат по репортажите фотографиите од посетите на Света Гора, Кина, Египет и особеностите на мијачкиот крај.

Кипроски беше заштитен знак на манифестацијата „Галичка свадба“ и ги следеше сите нејзини изданија. 

Автор е на тринаесет книги и монографии меѓу кои „Галичник засекогаш“, „Манастир Свети пророк Илија-Долно Јеловце“, „Сага за македонските воени пилоти“, „Духовните светилишта на гостиварското архијерејско намесништво“, „Поглед низ времето“ итн. Во делото „Сага за македонските воени пилоти“, создадено заедно со публицистот Ставре Џиков, првпат беа претставени сведоштва и документи за почетоците на македонското воздухопловство и првиот лет со македонско знаме во 1992 година.

Минатата година ја промовираше својата последна монографија „Светот без Македонија не е цел“, како круна на богатата кариера. Неговиот опус содржи и бројни репортажи од Македонија и светот, а како новинар известувал од значајни спортски и културни настани, меѓу кои и ЗОИ Сараево 1984.

„Кипроски остави силен печат во македонското новинарство со својата посветена и професионална работа, а зад себе остава богато новинарско творештво и траен спомен меѓу колегите и пријателите. Нека му е вечна слава“, напиша неговиот долгогодишен пријател, Мане Јаковлески.