Почина емирот на Кувајт

Кувајтскиот емир Шеик Наваф ал-Ахмад ал-Сабах почина денеска на 86-годишна возраст, по нешто повеќе од три години откако ја презеде власта во заливската земја богата со нафта, сојузник на САД. Причината за неговата смрт не беше веднаш објавена. Емир беше примен во болница минатиот месец поради, како што тогаш државната новинска агенција го опиша итен здравствен проблем, но беше речено дека е во стабилна состојба.

За наследник е именуван престолонаследникот Шеик Мешал ал-Ахмад ал-Сабах (83), кој е де факто владетел на Кувајт од 2021 година, кога емирот се откажа од поголемиот дел од своите должности. Шеикот Наваф стана емир во септември 2020 година по смртта на неговиот брат Шеик Сабах, кој владееше повеќе од една деценија и ја обликуваше надворешната политика на земјата повеќе од 50 години.

Тој се сметаше за градител на консензус
Дипломатите го гледаа шеикот Наваф како создавач на консензус, иако неговото владеење беше обележано со интензивен конфликт меѓу владата и избраниот парламент, што ги спречи клучните структурни реформи во заливската земја.

Во изминатите месеци се врати консензусот меѓу владата и парламентот. Кувајт, сопственик на седмите по големина нафтени резерви во светот, се граничи со Саудиска Арабија и Ирак, а се наоѓа на другата страна на Заливот од Иран.

Одржуваше рамнотежа во односите со соседите
Откако ја презеде функцијата во 2020 година, шеикот Наваф одржува надворешна политика која одржува рамнотежа во односите со овие соседи, додека во земјата под негово владеење беа формирани осум влади. Според кувајтскиот устав, престолонаследникот автоматски станува емир, но ја презема власта дури откако ќе положи заклетва во парламентот. Новиот емир има рок од една година да именува наследник.