По 11 години падна снег во Јоханесбург

Јоханесбург – Жителите на најголемиот град во Јужна Африка, Јоханесбург, беа изненадени од првиот снег по 11 години, а некои деца за првпат видоа снег.

Во делови од Јужна Африка снег редовно паѓа во зимските месеци, кои на јужната хемисфера се од јуни до август, а Јоханесбург последен пат видел снег во август 2012 година, објави Гардијан.

На социјалните мрежи жителите на Јоханесбург го опишаа снегот што падна во понеделникот како „чиста магија“ и „прекрасен почеток на неделата“.

Јужно од градот во Бракенхерст, снимател на Ројтерс видел деца како прават снежни топки и снежни ангели во теренот на едно училиште.

Последен пат во Јоханесбург падна снег во 2012 година, а претходно во 2007 година.

Снег во Јоханесбург паѓа во просек на секои пет години, а снег тежок како во понеделник се забележува на секои 10 до 20 години, изјави професорот по климатологија на Универзитетот во Витвотерсранд, Франсоа Енгелбрехт.