Пасечник: Нема подготовки за референдум во Луганск

Во моментов нема подготовки за одржување референдум за присоединување на самопрогласената Луганска Народна Република (ЛНР) кон Русија, изјави денеска лидерот на ЛНР, Леонид Пасечник.

Тој посочи дека негово лично мислење е дека е можен ваков референдум, пренесе Тасс.

-Дадов таква изјава. Би сакал да биде јасно: тоа е мое лично мислење. Во моментов ништо не се презема за да се организира таков референдум, изјави тој за новинарите.

Пасечник посочи дека сега клучна цел е прекин на борбите.

Претходно денеска тој изјави дека референдум за влез на оваа украинска територија во Русија може да се одржи на територијата на самопрогласената Луганска Народна Република.

-Мислам дека во блиска иднина на територијата на републиката ќе се одржи референдум на кој народот ќе го искористи своето апсолутно уставно право и ќе го каже своето мислење за приклучување кон Руската Федерација, рече Пасечник на средбата со странските новинари.