Овие европски аеродроми ги воодушевуваат патниците: Многу други сеуште се кошмар

Патниците кои бараат помалку стрес ова лето треба да ги избегнуваат големите европски центри како Париз и Лондон, според најновите глобални рангирања на аеродромите.

Додека милиони Европејци се впуштаат во летните одмори, ново истражување открива кои аеродроми нудат најбезбедно и најпријатно искуство, а кои, пак, би можеле сериозно да го тестираат вашето трпение.

Организацијата „ЕрХелп“, која се занимава со заштита на правата на патниците, ја објави својата годишна листа на најдобри аеродроми во светот, оценувајќи ги според точноста на летовите, задоволството на патниците и квалитетот на услугите.

И додека големите аеродроми како што се парискиот „Шарл де Гол“ и лондонскиот „Гетвик“ имаа разочарувачки резултати, помалите европски аеродроми покажаа завидни нивоа на сигурност и односи со клиентите.

Кои се најдобрите аеродроми во Европа?
Глобално, најдобро оценет аеродром беше Меѓународниот аеродром Кејптаун во Јужна Африка, кој доби оценка од 8,6 за точност на летовите и 8,7 за задоволство на клиентите, ставајќи го на врвот на листата од 250 аеродроми од 68 земји.

Најдобар аеродром во Европа беше Берген Флесланд во Норвешка, кој беше рангиран на 9-то место во светот и беше лидер во Европа во однос на точноста на летовите.

Билбао во шпанскиот баскиски регион (16-то место), како и уште два норвешки аеродроми – Боде (23-то место) и Осло Гардермон (28-мо место) – исто така беа високо рангирани, додека Рејкјавик Кефлавик во Исланд го зазеде 30-тото место.

Интересно е што, иако се најде само на 130-то место во генералниот пласман, аеродромот во Луксембург доби највисока оценка во Европа за задоволство на патниците (9,0).

Амстердамскиот Шипхол (111-то место) беше најдобро оценет во категоријата храна и пијалоци – 8,3.

Франција и Велика Британија се меѓу најлошите, Грција на дното на листата
И покрај нискиот ранг, Тулуз-Блањак е најдобро оценет аеродром во Франција, рангиран само на 101-то место во светот.

Парискиот „Шарл де Гол“ заврши на 181-то место, со лоши оценки во речиси сите категории, додека лондонскиот „Гетвик“ беше уште пониско – на 235-то место.

Сите три, сепак, беа подобри од најлошиот аеродром во Европа – Дијагорас на Родос, кој заврши на 249-то место (од 250), со резултат од 6,05 и точност на летот од само 5,8.

Зад него е единствениот аеродром во Тунис (Тунис Картагина).

Како се оценуваат аеродромите?
Според методологијата на AirHelp, најголемата тежина (60%) е точноста на летовите, односно бројот на полетувања и слетувања во рок од 15 минути од закажаното време.

На пример, резултат од 5,8 за Diagoras значи дека само 58% од летовите биле на време.

Останатите 40% се поделени подеднакво помеѓу:

– искуства на патниците (персонал, чистота, организација),
– дополнителни услуги (ресторани, продавници и објекти).

Податоците беа собрани од повеќе извори и споредени со официјална статистика од владини агенции, аеродроми, услуги за следење на летови и историски бази на податоци.

Во истражувањето учествуваа повеќе од 13.500 патници од 58 земји, а рангирањето се однесува на периодот од 1 јуни 2024 година до 31 мај 2025 година.

Помали аеродроми – помалку стрес
Иако доцнењата и откажувањата на летовите честопати не се директно под контрола на аеродромот, оние што комбинираат ефикасна организација со квалитетна услуга и јасни информации се покажаа како најдобри.

Заклучокот од истражувањето е: патниците кои сакаат помалку стрес ова лето, треба да изберат помали регионални аеродроми во Скандинавија, каде што веројатноста за мирно и точно патување е значително поголема отколку во големите европски центри.