„Ова ќе го паметам цел живот“. Моника Црнокрак од Скопје е мис фотогеничност на Европа

Во Бејрут, Либан се одржа изборот за Мис на Европа за 2023г. Нашата држава ја претставуваше  Моника Црнокрак од Скопје која ја освои титулата Мис Фотогеничност (Miss Photogenic), во конкуренција на 35 девојки од исто толку европски држави.

Победничка, односно Мис на Европа за 2023 е претставничката на Италија, а прва придружничка е убавицата од Русија.

Изборот се одржа во театарската сала на Casino Du Liban во Бејрут, во организација на Style Events од Либан, кој традиционално веќе со години овој најголем европски избор за убавина го одржува во Бејрут.

 

“Во Либан поминавме прекрасни две недели со другите кандидатки од цела Европа во подготовки за големото финале, но и со многу забави, дружење и прошетки низ целиот Либан, кој на мене остави навистина фантастичен впечаток. Пресреќна сум поради титулата која ја освоив за мене, Македонија и Модното студио Црнокрак, ова e едно прекрасно искуство кое сигурно ќе го паметам цел живот”, изјави веднаш по финалето од Бејрут нашата Моника (24), која е ќерка на Светлана и Мики Црнокрак, сопствениците на Модното студио Црнокрак, кое ја поседува лиценцата за нашата држава за овој најголем европски избор за убавина.

Моника е висока 180 см, фотогенична како мајка ѝ, заврши Економски факултет во Скопје и е вработена во приватна фирма. Посветена е на одбојката и на фитнесот.