„О2 Иницијатива“ со апел до кандидатите за градоначалници: Вардариште не може да чекa!

„Вардариште не може да чека! Доста е со молк, одлагања и префрлање на одговорност! Вардариште не е тема за кампања – тоа е закана за нашето здравје и иднината на Скопје. Сакаме решенија, а не задкулисни игри!“, реагира еколошката организација „О2 Иницијатива“.

Оттаму прашуваат кој од кандидатите за градоначалници на Град Скопје, Општина Аеродром и Општина Гази Баба е спремен да даде јавно ветување за санација на дивата депонија Вардариште.

„Ајде, идни градоначалници – да видиме колку го сакате Скопје, како се заштитува Аеродром и како се сака Гази Баба!“, истакнуваат од организацијата.

Нивните барања, по приоритет, се: Итна изработка и активирање на проектна документација за санација и ревитализација на Вардариште, за што е потребно итна изработка и носење на двата ДУПа за Вардариште од страна на Општина Гази Баба; Додека проектите не се готови: запечатување, оградување, осветлување, 24-часовна чуварска служба и видео надзор – во најбрз можен рок; и транспарентно известување за секој чекор, со прецизни рокови и конкретни активности за санација и ревитализација.

„Јавно и гласно обврзете се дека ќе ја решите оваа еколошка бомба! Ова не е борба за функција – ова е борба за ЖИВОТ и ЗДРАВЈЕ!“, апелираат од „О2 Иницијатива“.

Инаку, на 31 август изби пожар на Вардариште, поради што населбите Аеродром и Ново Лисиче, како и дел од Центар, останаа без електрична енергија. Како што информираа од Центарот за управување со кризи, се работеше за голем пожар кој зафатил голем дел од депонијата, а постоеше и можност да горат и постари објекти. Пожар на Вардариште годинава имаше и на почетокот на јуни.