Ново зголемување на референтната камата во Србија, сега е 5,75 отсто

Народната банка на Србија денеска ја зголеми референтната каматна стапка за 25 базични поени, на ниво од 5,75 отсто. Стапката на депозитни средства е задржана на ниво од 4,50 отсто, а стапката на кредитните капацитети е зголемена на 7,00 отсто.

При донесувањето на оваа одлука, Извршниот одбор на НБС имаше предвид дека и покрај знаците на попуштање, глобалните трошковни притисоци и увозната инфлација се сè уште високи и дека е неопходно да се ограничат нивните индиректни ефекти врз растот на цените на домашниот пазар, што може да се пренесе преку инфлаторни очекувања, како и влијание врз дел од притисоците кои доаѓаат од страната на побарувачката, соопштија од НБС.

– Пренесувањето на досегашното зголемување на референтната каматна стапка на каматните стапки на пазарот на пари, кредитите и штедењето укажува на ефективноста на преносниот механизам на монетарната политика преку каматниот канал, велат оттаму.

Истовремено, со одржувањето на релативната стабилност на курсот на динарот во однос на еврото, Народната банка на Србија значително придонесува за ограничување на прелевачките ефекти од растот на увозните цени врз домашните цени, како и на севкупната макроекономска стабилност во услови на зголемена глобална неизвесност.