Нобеловец од Нигерија (91) не доби виза зашто го критикувал Трамп

Нигерискиот нобеловец Воле Сојинка објави дека Соединетите Американски Држави му ја поништиле визата и му забраниле влез во земјата. Овој 91-годишен писател, кој претходно ја искина својата американска зелена карта како знак на протест против изборот на Доналд Трамп во 2016 година, ја потврди веста на прес-конференција одржана синоќа, пишува Би-Би-Си.

Сојинка, кој ја освои Нобеловата награда за литература во 1986 година, рече дека американскиот конзулат го замолил да го предаде пасошот за да може лично да му се откаже визата поради „нови, неодредени информации“. На прес-конференцијата, тој ја нарече поканата од конзулатот „прилично необично љубовно писмо од амбасадата“ и им порача на организациите што планираа да го поканат во САД „да не губат време“.

„Немам виза. Одбиен ми е влез“, рече тој на прес-конференцијата. Американската амбасада во Нигерија соопшти дека не може да коментира за поединечни случаи.

Тој предавал на американски универзитети со децении

Нобеловецот претходно имал постојан престој во САД, но се откажал од него во 2016 година уништувајќи ја својата зелена карта откако Доналд Трамп беше избран за претседател. Зелената карта, која му дава постојан престој, е многу ценета меѓу африканските имигранти во САД.

Сојинка вчера потврди дека повеќе нема зелена карта, шегувајќи се дека таа „паднала во ножици и била исечена на неколку парчиња“. Познатиот автор е редовен предавач на американските универзитети во последните 30 години.

Сојинка долго време го критикуваше тврдокорниот став на администрацијата на Трамп за имиграцијата и го поврза укинувањето на визата со неговите отворени критики. Тој рече дека неговата неодамнешна споредба на Трамп со уганданскиот диктатор – „бледиот Иди Амин“ – можеби придонела за сегашната ситуација. Иди Амин беше угандански воен офицер и диктатор кој владееше со земјата од 1971 до 1979 година, познат по својот брутален режим и масовните кршења на човековите права.

„Кога го нареков Доналд Трамп Иди Амин, помислив дека му давам комплимент“, рече Сојинка, додавајќи, „се однесува како диктатор“. На прашањето дали би размислил за враќање во САД, Сојинка одговори: „Колку години имам?“

Во јули оваа година, американскиот Стејт департмент објави големи промени во својата неимигрантска визна политика за граѓаните на Нигерија и неколку други африкански земји.

Според новите правила, речиси сите неимигрантски и недипломатски визи издадени на Нигеријци и државјани на Камерун, Етиопија и Гана сега ќе бидат со еден влез и ќе важат само три месеци, елиминирајќи ги визите со повеќе влезови до пет години што беа достапни претходно.