На летување во Грција почина психијатарот и ексдиректор на Здравствен дом – Скопје Виктор Исјановски

Исјановски беше на чело на најголемата здравствена установа во земјава од јуни 2019 година до смената на власта во 2024 година. Македонската јавност најмногу го памети по неговата активност за време на пандемијата со коронавирусот, кога Здравствен дом – Скопје со сите расположливи ресурси беше ставен во функција на борбата со Ковид-19, особено во процесот на масовна вакцинација.

Исјановски е роден е на 21 јули 1978 година во Скопје, каде ги завршува основното и средното образование.

По професија беше специјалист психијатар и зад себе остави богата професионална кариера.

Медицинскиот факултет го завршува во 2003 година, а дел од студиите поминува и на Универзитетот во Мајами, Калифорнија, САД.

Својата професионална кариера ја започнува во 2004 година во Казнено-поправната установа Идризово, а од 2006 година е дел од ЈЗУ „Психијатриска болница Скопје“, каде во 2007 година ја завршува специјализацијата по психијатрија. Во 2018 година е избран за раководител во оваа институција.

Магистерските студии на Медицинскиот факултет ги завршува со просек 10, а трудот на тема „Улогата на некои ризик фактори во етиопатогенезата на шизофренијата“ го брани со највисоки оценки. Беше избран и за асистент на Катедрата по психијатрија при Психијатриската клиника во Скопје.

Д-р Исјановски зад себе остава сопруга и две деца.

На социјалните мрежи, од Исјановски, во неверување се простуваат неговите пријатели.

„Длабоко сочувство до семејството, роднините и пријателите на прерано починатиот наш другар и сопартиец, д-р Виктор Исјановски.
Загубивме голем човек, посветен татко, сопруг, социјалдемократ, доктор-специјалист кој целиот свој живот го посвети на најважното: здравјето на луѓето.
Придонесот на д-р Исјановски за македонското здравство, неговата хуманост и борбата за вистинските социјалдемократски вредности ќе останат трајно наследство за сите нас.
Нека му е вечна славата и светол споменот“, напишаа од СДСМ.