Научниците со рекорд: 48 секунди одржаа температура од 100 милиони степени
Научници во Јужна Кореја успеаја за време на експеримент со нуклеарна фузија, да го соборат рекордот во одржување на температура од 100 милиони Целзиусови степени, седум пати потопла од јадрото на Сонцето.
Тие велат дека ова е важен чекор за развој на технологија која треба да овозможи комерцијална употреба на фузијата.
Нуклеарната фузија се обидува да ја реплицира реакцијата што се случува во Сонцето и другите ѕвезди со спојување на два атома заедно за ослободување на огромни количини енергија. Често се нарекува свет грал на чиста енергија и има потенцијал да обезбеди неограничена енергија, јави Си-ен-ен.
Процесот обично вклучува реактор во облик на крофна со дупка во средината, во кој водородот се загрева на екстремно високи температури за да се создаде плазма.
Плазмата со висока температура и висока густина, во која реакциите може да траат долго, е од витално значење за иднината на реакторите за нуклеарна фузија, изјави Јун Си-ву, директор на Истражувачкиот центар KSTAR на Корејскиот институт за фузија енергија (KFE).
Одржувањето на толку високи температури „не беше лесно да се докаже поради нестабилната природа на високотемпературната плазма“, изјави тој за Си-Ен-Ен, поради што овој рекорд е толку значаен.
KSTAR, уредот за истражување на фузија на KFE наречен „вештачко сонце“, успеа да ја одржи температурата на плазмата од 100 милиони степени за 48 секунди за време на тестовите помеѓу декември 2023 и февруари 2024 година, соборувајќи го рекордот од 30 секунди поставен во 2021 година.
Научниците од KFE рекоа дека можеле да го продолжат времето со подесување на процесот, вклучително и користење на волфрам наместо јаглерод во „пренасочувачите“ кои ја извлекуваат топлината и нечистотиите создадени од реакцијата на фузија.
Крајната цел е KSTAR да може да ја одржува температурата на плазмата од 100 милиони степени за 300 секунди до 2026 година, што е „критична точка“, рече Јун Си-ву.
Она што го прават научниците во Јужна Кореја ќе придонесе за развојот на Меѓународниот термонуклеарен експериментален реактор во јужна Франција, познат како ИТЕР, најголемиот таков реактор во светот кој има за цел да ја докаже изводливоста на фузија.
Работата на KSTAR „ќе биде од голема помош за да се обезбедат предвидените перформанси во работата на ITER на време и да се унапреди комерцијализацијата на енергијата на фузија“, рече Јун Си-ву.