Над илјада граѓани и 130 фирми донирале за епидемијата

Досега  над 1 000 граѓани и 130 фирми донирале за борба против епидемијата во Македонија при што се собрани над 200 милиони денари.Сега секој што има можност преку https://solidarnost.gov.mk/ може лесно и едноставно да придонесе во борбата против ковид со своја донација, објави министерката за финансии Нина Ангеловска на својот фејсбук-профил.

„Приклучете се, придонесете, споделете, впишете се во листата на донатори… Бидејќи заедно сме во ова, а заедно сме посилни!“,напиша министерката.

Може да се донира со платежна картичка, а сите што донирале досега преку банкарски трансфер може да се запишат во листата на донатори. Донираните средства се користат за справување со ковид и тоа: за набавка на опрема за здравството и обезбедување на потребите во здравството за справување со ковид и за социо-економски мерки, за поддршка на повеќе категории на граѓани на кои им е потребна помош.

Министерката Ангеловска изрази благодарност до над 1 000 граѓани кои досега донирале и над 130 компании за покажаната солидарност и општествена одговорност. Исто така, таа ѝ се заблагодари на УНИ банка, која го поддржува овој проект и овозможува процесирање на сите донации без какви било трошоци.