Лондон под притисок да ги намали енергетските трошоци пред новата индустриска стратегија

Првата индустриска стратегија на Велика Британија по осум години би можела да биде сериозно загрозена доколку Владата не понуди дополнителни мерки за намалување на исклучително високите трошоци за енергија со кои се соочува индустријата, предупредија денеска пратеници и бизнис-секторот.

Министрите работат на стратегијата што треба да биде објавена следната среда, заедно со повеќегодишниот преглед на јавната потрошувачка. Очекувано, стратегијата ќе ги нагласи приоритетните сектори во рамки на планот на лабуристичката влада за економски раст.

„Високите цени на електричната енергија во Велика Британија ги одвраќаат инвеститорите и ја ослабуваат конкурентноста на британската индустрија на глобалниот пазар, како и нејзината способност за декарбонизација“, се наведува во извештајот на парламентарната комисија за бизнис и трговија.

Комисијата препорачува индустриската стратегија да вклучува конкретни мерки со кои би се изедначиле условите со меѓународните конкуренти, особено во однос на трошоците за енергија.

Во понеделникот, индустриската организација Make UK исто така повика на намалување на индустриските енергетски трошоци, за кои вели дека се највисоки меѓу развиените економии. Организацијата предложи укинување на таксите за климатски промени од енергетските сметки и посочи дека извештајот на парламентарната комисија е уште едно предупредување за сложената состојба на индустријата.

Извршната директорка на Конфедерацијата на британската индустрија, Рејн Њутн-Смит, во синоќешен говор повика Владата да ги отстрани т.н. „политички трошоци“ од енергетските сметки.

Таа изјави дека лажна е дилемата меѓу поевтина енергија и климатски цели, но дека енергетски интензивните сектори имаат сè поголема мака да останат конкурентни во земјата, додека им е потребна и поддршка за процесот на декарбонизација.

„Не можеме да обезбедиме економска сигурност без сериозни мерки во енергетиката. Без тоа, секоја индустриска стратегија, секој сериозен економски план е осуден на неуспех“, рече Њутн-Смит.