Лекарска комора: Пријавувајте ги докторите кои шират невистини за вакцините
Здравствените работници да се воздржуваат од промоција и споделување на шпекулации и непроверени сознанија, порачува Лекарската комора. Ги охрабрува граѓаните да ги пријавуваат таквите случаи.
На Фејсбук и другите социјални мрежи постојано циркулираат ставови на доктори, медицински персонал и лица кои се претставуваат како такви, со кои се оспоруваат бројни аспекти на пандемијата- од самата болест до вакцинацијата.
„Здравствените работници треба да споделуваат ставови кои се базираат на научно докажани факти и да се воздржуваат од промоција и споделување на шпекулации и непроверени сознанија“, порачуваат од Комората.
Тие повикуваат да се пријавуваат кај нив случаите кои „шират псевдонаука и невистини за ефектите од вакцинацијата, ефектот од почитување на мерките за заштита и опасноста од вирусот“.
Од Лекарската комора наведуваат дека вакцинацијата е најефикасното решение за заштита од вирусот, која значително ги намалува шансите за да настане инфекција како и компликации од болеста.