Лекар тврди дека еден симптом на висок холестерол може да влијае на нашиот слух

Губењето на слухот може да биде знак за висок холестерол. Според д-р Питер Бајром, промените во слухот може да бидат помалку познат знак на таканаречениот тивок убиец.

„Иако можеби не е првиот знак што се појавува, дефинитивно е нешто на што треба да внимавате“, изјави тој за „Експрес“.

Според Бајром, холестеролот ги стеснува артериите, што неизбежно го ограничува протокот на крв. Нашите уши зависат од здравото снабдување со крв и без него не можат да функционираат правилно и тоа може да доведе до проблеми со слухот.

„Кога снабдувањето со крв до чувствителните структури на внатрешното уво е нарушено, тоа може да резултира со губење на слухот“, објаснува тој.

На пример, луѓето со висок холестерол може да имаат потешкотии да ги разберат разговорите во бучни средини или може да не слушаат добро високи звуци.

Холестеролот е вид на маснотии што телото ги користи за да изгради клеточни ѕидови и да синтетизира некои есенцијални хормони и е нормален градежен блок на секоја клетка во телото. Се произведува во црниот дроб и се апсорбира од животинските масти кои ги консумираме. Кога нивото на холестерол е високо, артериите може да се затнат, што го нарушува протокот на крв. Доколку не се стави под контрола, покачениот холестерол може да доведе до зголемен ризик од болести на срцето и крвните садови, како и до срцев удар.