Лавров: Западот верува во сатаната

Рускиот министер за надворешни работи Сергеј Лавров ги обвини западните земји дека наводно веруваат во сатаната и дека сакаат да го уништат консензусот во Организацијата за безбедност и соработка во Европа (ОБСЕ). „Сè уште веруваме дека само консензус може да го спаси ОБСЕ. А Западот – не знам во што верува, веројатно никој освен сатаната – прави сѐ за да го уништи консензусот“, рече Лавров на прес-конференцијата по разговорите со генералниот секретар на ОБСЕ, Феридун Синирлиоглу. Шефот на руската дипломатија нагласи дека Западот презема намерни чекори кои го загрозуваат самото постоење на организацијата.

Според Лавров, принципите и целите на ОБСЕ во моментов се грубо игнорирани, во врска со што тој изрази надеж дека искуството и професионалноста на генералниот секретар ќе помогнат да се врати организацијата во нејзините темели, кои „свечено беа прогласени на бројни самити и декларации и кои сега очајно и требаат на Европа“. „Организацијата на 50-годишнината од завршниот акт на Хелсинки се приближи во многу длабока криза, во која беше доведена од земјите на НАТО и ЕУ“, нагласи рускиот министер.

Феридун Синирлиоглу рече дека како генерален секретар на ОБСЕ останува посветен на соработката со сите 57 земји-учеснички во организацијата. „Русија е една од најважните членки на ОБСЕ“, истакна тој.

ОБСЕ е создаден во 1975 година, кога 35 држави го потпишаа Хелсиншкиот договор, со кој беше основана Конференцијата за безбедност и соработка во Европа (КЕБС). Во 1995 година, организацијата го доби своето сегашно име. ОБСЕ во своите активности посветува внимание на три клучни области: воено-политичка безбедност, економски и еколошки прашања и заштита на човековите права.