Кој ги организираше немирите во Ирска?

Шефот на полицијата на Република Ирска за немирите во четвртокот во центарот на Даблин ја обвини „лудачката, хулиганска фракција водена од екстремно десничарската идеологија“.

Бунтот избувна неколку часа откако три деца и училишен асистент беа избодени со нож пред блиското основно училиште. Ирска се гордее со своето гостопримство, па затоа многу Ирци сега се прашуваат што го води екстремно десничарското движење таму?

Иако одговорот на тоа е комплициран, треба да се запомни дека пред два века миграцијата имаше видно место во приказната за Ирска.

Милиони Ирци го напуштија островот; повеќето бегаа од сиромаштија и глад, други од политички причини. Ирците биле меѓу најбројните емигранти во Америка, а во голем број емигрирале и во други земји, особено во Велика Британија и Австралија.

До неодамна емиграцијата беше важен факт за ирскиот живот, но во последните 20 години ова во голема мера се промени, почнувајќи со проширувањето на ЕУ и неодамна со имиграцијата од Индија, Бразил, Филипините, Нигерија и други земји околу светот.

Сега мигрантите доаѓаат во Ирска, а најновите бројки на Централниот завод за статистика (ГСО) за 2022 година покажуваат дека една петтина од населението во 26-те окрузи во Република Ирска е родено во странство.

И покрај овие податоци, миграцијата едвај се појави како прашање во политичкиот дискурс на ирските партии. Дури и за време на економската криза во 2010 година, кога невработеноста вртоглаво порасна и Ирска доби помош од Европската унија и Меѓународниот монетарен фонд, странската имиграција не се сметаше за голем проблем, пренесува Јутарњи лист.

Важно е да се напомене дека Ирска нема важна десничарска политичка фигура како Марин Ле Пен, Џорџија Мелони или Герт Вилдерс. Ова делумно се објаснува со сеќавањето на Ирците за емиграцијата и желбата да бидат љубезни кон новодојденците. Како што истакнува Би-Би-Си, многу Ирци сè уште се сеќаваат на расистичките табли во лондонските пансиони на кои пишува: „Забрането за црнци, забрането за Ирци, забрането за кучиња“.

Но, неодамна, водечките политичари и полиција се повеќе зборуваат за заканата од екстремно десничарските активисти кои го искористуваат недостигот на станови, кризата на трошоците за живот и стравувањата од зголемениот број на баратели на азил.

Се почесто се слушаат „Ирска е полна“ и „Ирска за Ирците“, а насилството во четвртокот вечерта не е првпат екстремната десница да предизвика немири. Во септември, полицајците мораа да ги изведат пратениците надвор од зградите на парламентот, откако демонстрантите ги блокираа влезовите и покажаа лажни бесилки.