Касами: Кој и да ги предводи министерствата, Албанец или Македонец, ќе работи за сите
Тој изрази надеж дека преговорите како резултат ќе имаат влада која ќе биде компететна, со професионалци, која ќе биде со луѓе кои ќе работат за државата и за граѓаните без разлика на нивната етничка припадност.
– Ние сме свесни дека во една мултиетничка држава и општество како што е Македонија не можат сите министри да бидат Албанци и Македонци. Но, било кој да биде во едно министерство треба да работи за сите граѓани без разлика на етничка и верска и друга припадност. Во оваа фаза имаме разбирање меѓу партнерите кои ја договараат следната влада дека без разлика кој каде ќе седне, во која фотеља, ќе треба да работи за сите граѓани. Ова е многу важно за нас затоа што во минатото иако имаше многу министерства кои беа предводени од Албанците, ниту работеа доволно за Албанците ниту за другите, ниту за Македонците. Значи етничката припадност за нас не е најаважна за ние да го реализираме тоа што го имаме ветено – изјави Касами.
На прашањата дали е познато колку министерски места ќе се распределат меѓу партнерите, Касами потенцира дека кога ќе има краен договор ќе им го соопштат на јавноста.
– Тоа е дел од стратегијата за преговарање, ние можеме да бараме пола Влада, може да ни се понуди и многу малку, но на крај ќе дојдеме до тоа што ќе биде најсоодветно за сите партнери во следната Влада. Што е најважно, во интерес на граѓаните – рече тој.
За изјавата на Али Ахмети дека прегласувањето во среда може да донесе меѓуетнички тензии, Касами коментира дека тоа било во минатото.
– Секој си зборува за тоа што знае да го прави. Али Ахмети, така договарал во минатото и така постапувал во минатото. Али Ахмети знае како ги добил и овие мандати сега. Затоа е во паника. Ние едноставно кажуваме да им дадеме можност на граѓаните во среда да излезат и да гласаат. Ако тој е сигурен во тие гласови што ги добил, треба да биде мирен дека пак ќе ги добие. Ако знае дека ги добил на начин што не е демократски, не е фер, не е слободна волја на граѓаните…, затоа е во паника. Ние кажуваме дека треба да создадеме услови во среда и тие граѓани да излезат и да гласаат со слободна волја за да може да кажеме кој ќе биде нивен претставник во Собранието. Ние се надеваме дека ќе имаме добар резултат – изјави лидерот на Движењето Беса.