Како терминалите стануваат галерии за современа уметност? Овие европски аеродроми се како музеи достапни за секого

Од Рим и Милано до Амстердам и Минхен, европските аеродроми се трансформираат во простори на уметност и архитектура, нудејќи им на патниците изложби, скулптури и интерактивни инсталации што го претвораат престојот во терминалот во вистинско музејско искуство.

Современите европски аеродроми сè повеќе излегуваат од рамките на класичните транзитни простори и се претвораат во вистински културни дестинации.

Додека чекањето на лет, застојот или доцнењето понекогаш може да траат со часови, сè поголем број аеродроми го користат тој простор и време за да им понудат на патниците извонредно уметничко искуство.

Студијата на „Блеклејн“ покажува дека просечниот патник поминува околу 133 минути на аеродромот, што е доволно време за да се потопи во уметноста, историјата и архитектонската убавина наместо досадата.

Европски примери што го менуваат искуството при патувањето
Италија е еден од лидерите во овој тренд.

Во 2017 година, аеродромот Фјумичино во Рим започна соработка со Археолошкиот парк Остија Антика и воведе антички римски артефакти директно во патничкиот терминал.

Една година подоцна, аеродромот Бари Карол Војтила дополнително ја подобри својата понуда со постојана изложба на современа уметност и повремени изложби посветени на италијански уметници како што е Џузепе Де Нитис.

Во Милано, аеродромот Малпенса е преку проектот WOW! – Walls of Wonder го претвори терминалот во динамична уметничка галерија, со мурали и скулптури што ги поздравуваат патниците штом ќе излезат од авионот.

Аеродромот во Ница во Франција соработува со локални уметници за да ја претстави уметничката сцена на Азурниот брег, додека аеродромот Схипхол во Амстердам е еден од ретките во светот што има своја филијала на Ријксмузеумот, каде што посетителите можат да видат оригинални дела од холандски мајстори – бесплатно и без да мора да го напуштат терминалот.

Во Германија, аеродромот во Минхен нуди уметнички инсталации, концерти во живо, па дури и зимски божиќен пазар со лизгалиште за време на празниците.

Уметноста како културен идентитет на едно место
Уметничките инсталации на аеродромите не се само декорација, тие пренесуваат пораки, вредности и идентитет на градовите и земјите каде што пристигнуваат патниците.

Во Рим, изложбата на Берниниевиот „Салватор Мунди“ или скулптурата на кит од уметникот Маркантони со силна еколошка порака покажуваат како уметноста може да пренесе универзални теми – и тоа на места кои до вчера беа само чекалници.

Повеќе од транзит – иднината на аеродромот е во искуството
Аеродромите сè повеќе се трансформираат од логистички центри во мултифункционални простори: места за работа, одмор, шопинг, благосостојба – и уметност.

Се очекува уметничките инсталации да станат уште подигитални, интерактивни и одржливи во иднина, со употреба на зголемена реалност, паметни материјали и биоклиматска архитектура.

Европските аеродроми на тој начин не само што ги следат глобалните трендови, туку и ги поставуваат. Во време кога патниците бараат искуство, инспирација и идентитет, уметноста на аеродромите не само што го исполнува времето на чекање – туку го претвора во вреден дел од патувањето.