Јапонија издаде предупредување за мегаземјотрес, жителите се советуваат да носат шлемови

Јапонија издаде предупредување за мегаземјотрес откако земјотрес со јачина од 7,5 степени го погоди источниот брег на Аомори, најсеверната префектура на главниот остров Хоншу во Јапонија.

Службениците изјавија дека шансата за земјотрес поголем од 8 степени е само еден процент, но се надеваат дека предупредувањето ќе обезбеди јавноста да биде подготвена во случај на силен земјотрес кој би можел да биде исто толку разорен како катастрофата од 2011 година во која загинаа речиси 20.000 луѓе.

Беше истакнато дека постои зголемен ризик од земјотрес со јачина од 8 степени според Рихтеровата скала, поради што беше упатен апел до населението да биде подготвено.

Јапонската метеоролошка агенција соопшти дека силниот земјотрес од понеделник привремено ги зголемил потенцијалните ризици во крајбрежните региони Хокаидо и Санрику.

Земјотресот од 2011 година предизвика цунами што ги погоди северните крајбрежни градови во префектурите Ивате, Мијаги и Фукушима. Цунамито, кое во некои области надмина 15 метри, ја оштети нуклеарната централа Фукушима Даичи.

Службениците нагласуваат дека најновото предупредување не предвидува никаков мега-земјотрес во кое било конкретно време или локација.

На жителите им се советува да бидат внимателни и подготвени додека продолжуваат со своите секојдневни активности и работа. Службениците им советуваа на луѓето да носат торба за итни случаи што содржи залихи од дневни потреби за неколку дена, заедно со чевли и шлемови.