Израелската армија за прв пат влезе во Сирија по 50 години
Израелските копнени сили ја преминаа демилитаризираната зона во Сирија за прв пат по војната на Јом Кипур во 1973 година и договорот за прекин на огнот од 1974 година, изјавија две израелски официјални лица за „Њујорк тајмс“.
Според нив, израелската армија зазела стратешки позиции на планината Хермон, како и „неколку други локации кои се сметаат за важни за стабилизирање на контролата над областа“. Ова е направено со цел да се спречи вооружената опозиција која го собори режимот на Башар ал Асад да преземе контрола над воените објекти во близина на Голанската висорамнина со цел да ги искористи против Израел, прецизираат изворите на весникот.
Израел ги известил САД за нивните планови да воспостават контрола во тампон зоната, уверувајќи дека тоа е привремена мерка која ќе трае од неколку дена до неколку недели додека не се стабилизира безбедносната ситуација долж границата, пишува „Аксиос“. Според два извори на публикацијата, Тел Авив во последните денови испратил предупредување до сириските антивладини сили дека доколку се приближат до границата, израелската армија ќе преземе акција.
Израелскиот премиер Бенјамин Нетанјаху ги објасни дејствијата на израелските трупи со фактот дека договорот од 1974 година, според кој беше воспоставена тампон зоната, „пропадна“ и сириската армија ги напушти своите позиции. „Ние дејствуваме прво и основно за да ја заштитиме нашата граница“, нагласи Нетанјаху.
Израел ја испрати својата војска во Сирија откако сириските бунтовници го зазедоа Дамаск еден ден претходно, на 8 декември, а претседателот Башар ал Асад поднесе оставка и замина за Русија, каде што доби азил. Израелските сили прогласија неколку области на Голанската висорамнина за затворена воена зона.
Израел погоди и голем број цели во Сирија. Биле нападнати објектите за складирање на хемиско оружје за да се спречи да паднат во рацете на бунтовниците. Покрај тоа, Ројтерс објави израелски напади врз Дамаск, каде целта беше истражувачки центар што може да го користи Иран за развој на ракети со долг дострел. Уште еден напад беше извршен врз воздухопловната база Калхала во јужна Сирија.