Избори во Романија: Опозициските социјалдемократи во водство

БУКУРЕШТ – Романските опозициски социјалдемократи (ПСД) го презедоа водството на националните избори во неделата, сметани како клучни за иднината на земјата во европскиот мејнстрим, но најверојатно нема да ја формираат следната влада. ПСД, кој возеше на бранот на незадоволство кај гласачите поради пандемијата на корона вирусот и ветувањата на малцинската либерална влада за фискално ограничување, ќе се бори да формира функционално мнозинство против актуелниот премиер Лудовик Орбан.

Претседателот Клаус Јоханис, сојузник на либералите кој треба да го номинира премиерот, постојано повторуваше дека ќе му даде задача на Орбан да формира коалициска влада на десниот центар за да го заузда буџетскиот дефицит и да го врати кредибилитетот на земјата-членка на Европската унија меѓу странските инвеститори. Самиот Орбан прогласи победа во неделата вечерта, откако излезните анкети покажаа дека резултатот е изедначен.

Според првичните резултати, социјалдемократите освоиле 29,8 отсто од гласовите за долниот дом, додека десничарско-либералната партија ПНЛ на премиерот Лудовик Орбан, 25,11 проценти. Центристичката алијанса УСР-Плус доби 14,5 отсто од гласовите. Во овие бројки не се вклучени и гласовите на дијаспората, околу 265.000.

Следниот парламент се чини дека ќе има само пет партии, вклучувајќи ги етничките унгарски од УДМР и новоформираната Алијанса за обединување на Романците (АУР), ултранационалистичка групација.

Прераспределбите во парламентарните места ќе ги променат конечните проценти и ќе ги фаворизираат најголемите партии, но аналитичарите велат дека либералите и УСР-Плус веројатно ќе треба да кооптираат друга група во парламентот за да добијат мнозинство. „Тоа е слаб резултат за Либералната партија“, рече Серџиу Мискоиу, професор по политички науки на Универзитетот Бабес-Болјаи. „Колку повеќе партии треба да формираат коалиција, толку покомплицирани ќе бидат компромисите што треба да ги направи“. Одѕивот беше најмал од падот на комунизмот во 1989 година, со децениска апатија на гласачите во врска со неуспешните реформи, додадени од стравот од зараза од корона вирусот на избирачките места.

ЕУ ќе поздрави владата предводена од Орбан, по долгогодишните напори на неколку социјадемократски влади да ја потиснат независноста на судовите – обвинение што тие го негираа – што го пресликуваше ремонтот на судството во Полска и Унгарија. Орбан, исто така, водеше кампања на ветување дека ќе ја приближи Романија до мејнстримот на ЕУ по повеќегодишниот фискален популизам, политичката нестабилност и занемарувањето на разурнатата инфраструктура и јавните услуги. (Ројтерс)