Интернет криминалците ја користат епидемијата за да напаѓаат цели држави

Интернет-криминалците ја користат пандемијата на коронавирус за да ги префрлат целите за компјутерски напади од поединци и мали бизниси кон големи корпорации, влади и критична инфраструктура, соопшти Интерпол.

Меѓународното тело соопшти дека неколку земји пријавиле малициозен софтвер, напади врз влади и болничка и медицинска инфраструктура, што веќе биле во неволја поради здравствената криза предизвикана од коронавирусот.

Полициските истраги покажуваат дека повеќето напаѓачи точно ја проценуваат максималната сума што може да ја побараат од нападнатите компании и организации, нагласуваат од Интерпол.

– Киберкриминалците развиваат и ги интензивираат нападите со алармантна стапка, искористувајќи го стравот и несигурноста предизвикани од социјалната и економската состојба поради Ковид-19, предупреди генералниот секретар на Интерпол, Јурген Сток.

Организацијата соопшти дека натамошно зголемување на стапката на компјутерски криминал е „многу веројатно во блиска иднина“, особено поради ранливоста предизвикана од работа од дома.

Неточни информации за Ковид-19 се исто така причина за „зголемена загриженост“ во повеќе од 20 проценти од државите што одговориле на истражувањето за компјутерски криминал, додава Интерпол.