Голема победа на ХДЗ на изборите во Хрватска

Според официјалните податоци од Државната изборна комисија врз основа на досега обработените податоци, ХДЗ има 66 места во Саборот, коалицијата „Рестарт“ што ја предводи опозициската СДП 41, Демократски покрет на Мирослав Шкоро 16, Мост 8, „Можеме“ 7, Странка со име и презиме-Паметно–Фокус 3 места и ХНС едно место.

За формирање влада, потребни се 76 пратенички места од вкупно 151 колку што има пратеници во хрватскиот парламент.

Во изборниот штаб на коалицијата „Рестарт“ не се задоволни од резултатите, а на социјалните мрежи се бара оставка од лидерот на опозициската СДП која ја предводи оваа коалиција Давор Бернардиќ. Потпретседателот на партијата Рајко Остојиќ во изјава за медиумите рече дека за тоа ќе одлучи самиот Бернардиќ.

Како најголемо изнанадување на овие избори се смета резултатот на коалицијата „Можеме“, во која се собрани шест леви и зелени партии.

Првичните податоци покажуваат дека излезноста на изборите била близу 50 отсто, што се смета за рекордно ниска. Засега не се познати причините за тоа, иако експертите во анализит посочуваат дека тоа е резултат на иселувањето на младите и тоа што изборите се одржуваат среде епидемија.

Денешните избори во Хрватска треаше да се одржат во декември годинава, но беа поместени за неколку месеци порано, поради стравувањето дека од есен е можен нов бран на епидемијата со коронавирусот.

Светските агенции пишуваат дека парламентарните избори во Република Хрватска во предизборните анкети беа најавени како многу неизвесни, но дека привремените резултати покажуваат неочекувано лесна победа на ХДЗ.

Германската агенција ДПА посочува дека ХДЗ победи на изборите со неочекувана леснотија, а коалицијата Рестарт предводена од социјалдемократите целосно потфрлила. Агенцијата наведува дека анкетите на јавното мислење пред изборите покажале поинаков исход, односно многу близок резултат помеѓу Рестарт и ХДЗ под водство на премиерот Андреј Пленковиќ.

ДПА вели дека коцкањето на премиерот Пленковиќ изборите да се одржаат неколку месеци порано даде резултати.

Се додава дека ХДЗ и Домовинскиот покрет на Мирослав Шкоро би можеле заедно да формираат мнозинство во парламентот кој има 151 место. Сепак, ова може да се избегне откако на ХДЗ ќе ѝ се додадат гласовите на малцинствата и дијаспората, велат од германската агенција.

Францускиот Франс прес пренесува дека по изборите, што се одржаа во сенка на повторното појавување на кризата со корона, конзервативците на ХДЗ се во многу добра позиција да формираат коалициска влада која ќе мора да се справи со пандемијата на коронавирус и нејзините економски последици.

Агенцијата потенцира дека предизборните анкети најавија многу неизвесна борба, но дека Пленковиќ јасно ги победи главните противници, коалицијата „Рестарт“.

Една можна опција за ХДЗ да формира влада е да ги започне преговорите со Домовинскиот покрет на Мирослав Шкоро.

Додека АФП ги пренесува зборовите на Пленковиќ дека „на Хрватска не ѝ се потребни експерименти како Бернардиќ и Шкоро“, агенцијата Ројтерс посочи дека во овој момент, предизвикувачки и за јавното здравство и за економијата „Хрватска заслужува да биде водена од одговорни луѓе со искуство“.

И АФП и Ројтерс известуваат дека новата влада ќе мора да се соочи со евентуален економски пад од дури 10 проценти и ја нагласуваат зависноста на земјата од туризмот, што може да доживее пад од 70 проценти

Инаку, хрватските медиуми јавуваат дека има се повеќе барања на социјалните мрежи лидерот на СДП и коалицијата Рестарт, Давор Бернардиќ да си даде оставка.

Словенечката агенција СТА додава дека покрај неочекувано добриот резултат на ХДЗ и неочекувано лошиот резултат на СДП, најголемото изненадување на изборите е платформата „Можеме“ која прв пат учествува на парламентарните избори.