Гневниот Нетанјаху ги нападна Стармер, Макрон и Карни

Израелскиот премиер Бенјамин Нетанјаху жестоко ги нападна лидерите на Франција, Велика Британија и Канада откако тие се заканија со „целни санкции“ поради обновената воена офанзива на Израел во Газа.

Шефовите на британските, француските и канадските влади во заедничка изјава во понеделник ја осудија „неподносливата“ хуманитарна ситуација во опколената крајбрежна енклава и го повикаа Израел да ја запре својата нова, засилена кампања, која доаѓа по повеќемесечна блокада и вклучува нов бран копнени и воздушни напади.

„Израел претрпе гнасен напад на 7 октомври. Отсекогаш сме го поддржувале правото на Израел да ги брани Израелците од тероризам. Но, оваа ескалација е целосно непропорционална“, напишаа тројцата лидери.

„Нема да стоиме настрана додека владата на Нетанјаху ги спроведува овие скандалозни дејствија. Доколку Израел не ја запре обновената воена офанзива и не ги укине своите ограничувања за хуманитарна помош, ќе преземеме понатамошни конкретни акции како одговор“, додадоа тие.

Ретката, заедничка интервенција на британскиот премиер Кир Стармер, францускиот претседател Емануел Макрон и канадскиот премиер Марк Карни предизвика остра критика од Нетанјаху, кој ги нападна тројцата лидери во сопствена изјава доцна во понеделникот.

„Барајќи од Израел да ја прекине одбранбената војна за наш опстанок пред терористите на Хамас на нашата граница да бидат уништени и барајќи палестинска држава, лидерите во Лондон, Отава [sic] и Париз нудат огромна награда за геноцидниот напад врз Израел на 7 октомври, а воедно покануваат уште вакви злосторства“, напиша Нетанјаху на социјалните медиуми.

„Израел ја прифаќа визијата на претседателот Трамп и ги повикува сите европски лидери да го сторат истото“, додаде тој, очигледно мислејќи на предлогот на американскиот лидер да ја преземе Газа, да го протера нејзиното палестинско население и да ја обнови. Планот беше категорично отфрлен од земјите од Блискиот Исток и Европа и од Обединетите нации, кои предупредија против „секаков облик на етничко чистење“, но брзо беше прифатен од Нетанјаху.

Британско-француско-канадската декларација одразува целокупно влошување на ставовите на западните сојузници на Израел кон неговата тешка воена офанзива во Газа, која ја започна по прекуграничниот напад на Хамас на 7 октомври 2023 година во кој загинаа 1.200 Израелци.

Макрон јавно се расправаше со Нетанјаху минатата година откако повика на прекин на испораките на оружје за Израел, а повторно минатиот месец кога тој го предложи француското признавање на палестинската држава.

Холандија, исто така, неодамна ја повика ЕУ да го преиспита своето партнерство со Израел поради катастрофалната хуманитарна ситуација во Газа, каде што повеќе од 50.000 Палестинци се убиени, а стотици илјади се турнати кон глад и болести поради воениот напад на Израел.

Франција го засили притисокот во вторникот, објавувајќи дека е во прилог на холандскиот предлог за преиспитување на договорот за асоцијација на ЕУ со Израел. „Ја повикувам Европската комисија да го разгледа овој договор“, рече францускиот министер за надворешни работи Жан-Ноел Баро.

„Договорот има политичка димензија, а исто така и трговска. Не е во ничиј интерес да се прекине. Но, ситуацијата во Газа нè принудува да го зголемиме притисокот“, рече тој на француското радио.