ФТ: Кина повторно го отвора пазарот на обврзници за руските енергетски компании

Кина повторно ќе го отвори својот пазар на обврзници за водечките руски енергетски компании, што претставува нов степен на зближување меѓу двете земји во економска и политичка смисла, објави „Фајненшл тајмс“ (ФТ).

На состанок кон крајот на август во Гуангжу, кинеските регулатори им порачале на руските енергетски претставници дека ќе го поддржат издавањето т.н. „панда обврзници“, номинирани во јуани, пренесува весникот, повикувајќи се на анонимни извори.

Овој вид обврзници ги издава странска компанија или држава, но нивната емисија се одвива во Кина. Тие се номинирани во јуани, што значи дека инвеститорите во Кина – банки, фондови и осигурителни компании – не се изложени на девизен ризик.

Доколку планот се реализира, тоа ќе биде прво прибирање капитал од страна на руски компании во Кина од почетокот на војната во Украина во 2022 година. Последното слично издавање датира од 2017 година, кога рускиот производител на алуминиум „Русал“ издаде обврзници во вредност од 1,5 милијарди јуани (околу 179 милиони евра).

Веста доаѓа веднаш по средбата на рускиот претседател Владимир Путин и кинескиот претседател Си Џинпинг во Пекинг минатата недела. Си тогаш го нарече Путин „стар пријател“ и нагласи дека односите меѓу Москва и Пекинг „го издржале тестот на променливите меѓународни околности“.