Депресијата и губењето на меморијата се поврзани, особено загрозени се постарите од 50 години

Депресијата може да придонесе за губење на меморијата и обратно, открија научниците кои следеле речиси 8.200 Британци во текот на две децении.

Научниците откриле дека „промените во депресивните симптоми придонеле за забрзано губење на меморијата“ кај испитаниците на возраст над 50 години. Нивната просечна возраст беше 64 години.

Не само што депресијата влијае на меморијата, туку и обратно, заклучија научниците во студијата објавена од Американското медицинско здружение.

„Побрзата промена во меморијата е исто така реципрочно поврзана со побрза промена на симптомите на депресија со текот на времето“, велат американските и британските научници. Тимот вклучуваше научници и лекари од Универзитетскиот колеџ во Лондон, Медицинскиот центар на Универзитетот во Рочестер и Медицинскиот факултет во Сасекс.

„Психолошкото расположение и меморијата се суштински поврзани“, објаснуваат истражувачите, истакнувајќи дека иако когнитивната дисфункција претходно била поврзана со депресијата, „насоката на оваа асоцијација“ не е јасна.

Учесниците во студијата беа испитувани секоја втора година од 2002 до 2019 година со тестови за меморија и вербална флуентност и проценки на симптомите на депресија според Центарот за епидемиолошки студии.