Цимет во кафето помага при слабеење! Еве ја правата вистина
Има ли вистина во ова?
Не сите форми на цимет се исти
Постојат два вида цимет кои потекнуваат од кората на дрвото Cinnamomum. Првиот е кинески или касија цимет, кој е најзастапен и може да се најде во продавниците. Има горчлив вкус и содржи големи количества цинамалдехид, соединението кое на циметот му го дава карактеристичниот мирис и вкус – дури 95 проценти од кинескиот или касискиот цимет се направени токму од ова соединение. Друг вид е цејлонскиот цимет, кој е посладок и содржи околу 50-60 проценти цинамалдехид.
Дали циметот согорува масти? Што вели науката?
Истражувањето, кое беше спроведено врз основа на преглед на 35 студии кои испитуваа дали циметот може да влијае на обемот на половината, покажа дека дневната доза цимет помала од 1,5 грама (околу половина кафена лажичка) го намалува обемот на половината за 1,68 сантиметри. Сепак, повисоките дози од 1,5 грама на ден немаа значителен ефект.
Друга анализа која опфати 21 клиничко испитување со вкупно 1.480 учесници покажа дека циметот го намалува индексот на телесна маса (BMI) за 0,40 kg/m² и телесната тежина за 0,92 kg, но не го менува значително односот на маснотиите и мускулната маса.
Севкупно, резултатите од релевантните студии покажуваат многу мал ефект во губење на тежината за време на два до шест месеци употреба, без речиси никаква промена во составот на телото.
Како циметот делумно помага при слабеење?
Постојат неколку можни механизми. Циметот му помага на шеќерот побрзо да влезе во клетките, а со тоа го намалува нивото на шеќер во крвта и ја подобрува ефикасноста на инсулинот. Исто така, го подобрува начинот на кој ги разградуваме мастите кога ни е потребна енергија. Освен тоа, може да го продолжи чувството на ситост, бидејќи го успорува процесот на празнење на желудникот.
Кои се ризиците?
Циметот е генерално безбеден кога се користи како зачин за храна. Сепак, во последните месеци во САД и Австралија беа издадени предупредувања поради присуството на олово и други тешки метали во некои производи на база на цимет.
Исто така, една од состојките на овој зачин, кумаринот, кај некои луѓе може да биде токсична за црниот дроб. Кинескиот касија цимет содржи до еден процент кумарин, додека цејлонскиот цимет има значително помалку, околу 0,004 проценти. Затоа, земањето повеќе од две лажички касија цимет дневно може да го надмине препорачаното, безбедно ниво.
Што е со кафето и какаото?
Многумина веруваат дека кафето помага при слабеење, но нема доволно докази за тоа. Студијата покажа дека пиењето една шолја кафе е поврзано со мало намалување на тежината во текот на четири години, но само за 0,12 килограми во просек.
Што се однесува до какаото и темното чоколадо, тие се исто така поврзани со мало губење на тежината во некои студии, но резултатите се занемарливи – помеѓу 0,2 и 0,4 кг по четири до осум недели консумирање.
Што велат научниците?
Употребата на цимет може да има одреден ефект врз тежината, но не доволно за да предизвика значително губење на тежината без други промени во животниот стил.
Ако ви се допаѓа вкусот на цимет во вашето кафе, слободно додадете го, но не ставајте премногу. За жал, циметот во слатките колачи нема да ви помогне да согорите маснотии поради неговата висока калорична содржина. Ако сакате да изгубите тежина, постојат поефикасни методи