Бош најавува укинување на илјадници работни места низ целиот свет
Германскиот автомобилски добавувач Бош (Bosch) во понеделник соопшти дека очекува скромен раст на приходите оваа година, сигнализирајќи дека има намера дополнително да ги намали оперативните трошоци.
„И покрај стагнацијата во глобалното производство на возила, слабата побарувачка и доцнењата во електромобилноста и автоматизираното возење, Bosch Mobility ќе забележи мал раст оваа година“, соопшти компанијата.
Се очекува приходите од продажба да пораснат „нешто помалку од два проценти“, соопшти компанијата пред автосалонот IAA во Минхен, кој официјално се отвора во вторник.
Bosch е најголемиот светски добавувач на автомобилската индустрија, но продава и апарати за домаќинство, електрични апарати и топлински пумпи.
Автомобилската дивизија на Bosch учествува со 60 проценти во приходите на компанијата, а минатата година приходите паднаа за 0,7 проценти на 55,8 милијарди евра.
Покрај стандардните делови како што се системи за погон, безбедност, управување и сопирање, компанијата им снабдува и на производителите на автомобили високо-перформансни компјутери и софтвер.
„Во мобилноста базирана на софтвер, бизнисот на Bosch Mobility продолжува да еволуира од хардвер со вграден софтвер до услуги и целосно независен софтвер што производителите и партнерите потоа го интегрираат во своите системи“, соопшти компанијата.
„Работиме на софтвер и хардвер, одделно или заедно, стандардизирани, интегрирани, самостојни (…) Дури и најпаметниот автомобил нема да се помрдне ни милиметар во иднина без софистициран хардвер“, нагласи извршниот директор Стефан Хартунг на саемот.
Транзицијата кон мобилност базирана на софтвер веројатно дополнително ќе го зголеми притисокот врз заработката, предупреди Bosch, најавувајќи дополнителни намалувања на трошоците, покрај мерките иницирани на крајот на 2023 година откако менаџментот утврди дека одредени делови од бизнисот повеќе не се конкурентни.
Компанијата планира да намали илјадници работни места низ целиот свет, вклучително и во нејзината матична земја Германија, забележува агенцијата dpa.