Австралија ќе ѝ донира на Украина 49 тенкови „Абрамс“

Австралија  ќе ѝ донира на Украина 49 стари американски борбени тенкови „М1А1 Абрамс“, соопшти денеска пред состанокот на НАТО во Брисел.

„Ние стоиме со Украина во нејзината борба против илегалната инвазија на Русија“, рече австралискиот министер за одбрана Пат Конрој.

Опремени со топ од 120 мм, овие тенкови од 60 тони беа направени помеѓу 1985 и 1993 година и беа обновени пред да бидат купени од Канбера во средината на 2000-тите.

Австралискиот трансфер на остарените „Абрамс“ тенкови во „трета земја“ бараше дозвола од Соединетите Држави според регулативите за меѓународниот сообраќај со оружје (ИТАР).

Украинскиот претседател Володимир Зеленски ја поздрави оваа иницијатива на мрежата Х и изрази „благодарност“ до Австралија.

Украина ја доби првата серија употребени тенкови „М1А1 Абрамс“ во септември 2023 година, испорачани од Соединетите држави. Дел од австралиската флота е наменет и за складирање на резервни делови, се наведува.

На почетокот на годината Канбера објави дека нема да одговори на барањето на Киев за испорака на старите хеликоптери MRH90 Taipan, тврдејќи дека тие повеќе не се пловидбени.

Најновиот австралиски пакет е вреден 245 милиони австралиски долари. Со ова вкупната австралиска воена помош за Украина од руската инвазија во 2022 година изнесува 1,3 милијарди австралиски долари, а вкупната австралиска поддршка на 1,5 милијарди австралиски долари.