Астрономите открија древни ѕвезди во Млечниот Пат: Бледнееле со години, а потоа блеснаа
Астрономите открија мистериозна група џиновски, постари ѕвезди во срцето на Млечниот Пат кои испуштаат облаци од прашина и гас со големина на Сончевиот систем.
Ѕвездите, кои биле наречени „Стари пушачи“, лежеле долги години, бледнејќи речиси до невидливост, пред наеднаш да „издуваат“ огромни облаци од чад и да заблескаат со неверојатна светлина.
Откритието е направено при следење на речиси милијарда ѕвезди со инфрацрвена светлина за време на десетгодишното истражување на ноќното небо.
„Тоа е нов тип на ѕвезди и сите тие се чини дека се групирани во истиот дел од небото, многу блиску до центарот на нашата галаксија Млечен Пат“, изјави професорот од Универзитетот во Хертфордшир, Филип Лукас, кој го предводеше истражувањето.
Имено, астрономите работеа на снимање на ретко видени новородени ѕвезди – познати како протоѕвезди. Во текот на овие периоди, младите ѕвезди брзо добиваат маса проголтувајќи го околниот гас што формира ѕвезди, што доведува до нагло зголемување на сјајноста.
Тимот следеше стотици милиони ѕвезди и идентификуваше 32 еруптирачки протоѕвезди чија светлина се зголемила најмалку 40 пати, а во некои случаи и повеќе од 300 пати.
Меѓутоа, друга група на ѕвезди неочекувано се појави во анализата во близина на центарот на Млечниот Пат. Кога подетално се проучувале со помош на многу големиот телескоп на Европската јужна опсерваторија, се сметало дека седумте ѕвезди се нов тип на црвени џинови, кои истражувачите ги нарекле „Стари пушачи“. Конвекционите струи и нестабилноста во ѕвездата би можеле да предизвикаат ослободување на огромни облаци чад, предложи Лукас.
„Тоа се облаци со големина на Сончевиот систем. Нашата претпоставка е дека тие се облаци од прашина во една насока, веројатно од една точка на површината на ѕвездата“, рече професорот Лукас.
„Откривањето на нов тип на ѕвезда што исфрла материја може да има пошироки импликации за дистрибуцијата на тешки елементи во нуклеарниот диск и областите богати со метали на другите галаксии“, додаде професорот, пишува Гардијан.
Целиот извештај од ова истражување можете да го погледнете на линкот.