Aleksandra dhe Vllatko Mijallkov, shënjestër e përgjimeve në DSK
Aleksandra dhe Vllatko Mijallkov, respektivisht bashkëshortja dhe vëllai i Mijallkovit kanë qenë shënjestër e përgjimeve të DSK-së. Kështu deklaroi dëshmitari i sotëm Gjorgji Llazarevski, në rastin “Target-Fortesa”. I pyetur nga ana e prokurorit se a ka pasur ndonjë target të ndjeshëm ai dha emrat e Aleksandra dhe Vllatko Mijallkovit. Pas dëshmive të grumbulluara me vite nga Gjorgji Llazarevski së bashku me Zvonko Kostovskin për përgjime të paligjshme në DSK dhe pas dorëzimit të dëshmive tek Zoran Verushevski, ka vijuar arrestimi i këtij të fundit.
-Pas arrestimit të Verushevskit, shkova deri tek drejtuesit e MPB-së për të paraqitur rastin dhe për të treguar gjithçka që di. Drejtori i atëhershëm i Byrosë për Siguri Publike Goranço Savevski më dha një listë me përgjimet e përkthyera në gjuhën angleze, kërkoi nga unë të shkruaj cilat linqe kanë qenë në sistem. Erdhi Goran Grujevski dhe na tha që nuk është e mundur të jenë përgjuar Goran dhe Aleksandra Mijallkov. Tha se ai asnjëherë nuk do ta përgjonte familjen e drejtorit të tij dhe se ka dëshmitarë që do ta dëshmojnë këtë. I thash nuk është e saktë, le të thotë cilët janë ata dëshmitarë, atë që e di unë është e vërtetë.”
Llazarevski është ankuar edhe për sjelljen e prokurorëve lidhur me momentin kur ka dhënë dëshminë e tij për rastin “ Puç.”
Në rastin “Target-Fortesa” akuzohen Sasho Mijallkov,Goran Grujevski, Nikolla Boshkoski, Gordana Jankullovska, Toni Jakimovski, Vlladimir Vanellov dhe 5 persona të tjerë. Sipas aktakuzës, përmes tre sistemeve për ndjekje të komunikimeve në DSK, në periudhën nga viti 2008 deri në vitin 2015 në mënyrë ilegale janë përgjuar 4.286 numra telefoni për të cilat nuk ishte dhënë urdhër nga gjykata. Komunikimi është ndjekur para se të lëshohet dhe pas përfundimit të afatit për urdhrat e gjykatës të për ndjekjen e 1 541 numrave telefonike apo në total 5 827 numra. Gjatë asaj periudhe janë përgjuar mbi 20 mijë qytetarë./Alsat M